Editoryal: Haom ang pagbalik sa naandan

Editoryal: Haom ang pagbalik sa naandan
Editorial Cartoon by Ariel Itumay

Grabe ang kainit karong panahuna kay gipasamot sa El Niño phenomenon. Init matag Abril ngadto sa Mayo sa Pilipinas, apan matag igo sa El Niño, mosamot kini.

Mangauga ang kasapaan ug magnihit ang supply sa tubig kay bisan ang underground water nga tinubdan mogamay sab ang iyang tubod.

Naandan na sa daghang mga dekada nga ang gitawag og summer kun ting-init, Abril ug Mayo, maoy tingbakasyon sa mga tunghaan, gikan sa kindergarten ngadto sa college. Pipila ka mga tuig ang nakalabay, anam nga gibalhin og buwan ang pagsugod sa school year.

Apan naamguhan sa kagamhanan nga kon kabalak-an ang ting-uwan sugod sa Hunyo, kuyaw sab diay ang ting-init kay makamugna og sakit samtang makapatay sab kon lab-anan ang pagkabulad.

Sulod sa dugay nang panahon nga ang bakasyon sa Abril ngadto sa Mayo maoy naandan nga school vacation. Mao ni nga mga buwan nga sukad pa kaniadto init kaayo. Naandan usab ang pagbalik sa Hunyo nga mao say pagsugod sa ting-uwan.

Duna tuoy mga kausaban sa panahon, apan di ni maoy angay nga himuon unta nga hinungdan sa pag-usab sa school calendar. Gihimong katarungan mao ang pagsulod sa grabeng ting-uwan ug bagyo.

Apan ang paggrabe sa kahimtang sa panahon tungod man sa global warming nga di na masabot ang dagan sa panahon. Di na magtultol ang ting-uwan ug ting-init.

Di diay ang pag-usab sa school calendar ang solusyon sa suliran sa pagtungha sa kabataan sibo sa panahon, kon di ang pagpangita og paagi sa pag-adjust sa lakat sa panahon.

Kon ting-uwan o grabeng kainit, mahimo ra nga mag module ug mag-online class. Busa, wa na kinahanglana sa mga tinun-an ug magtutudlo sa pagtaho sa tunghaan. Nagamit kaayo ni panahon sa pandemic.

Karon gimando na ni Presidente Ferdinand Marcos Jr. ang pagbalik sa daan nga school ca­lendar. Sakto ug tukma kaayo kini nga lakang. Karon, nakita na sa kagamhanan nga wa kinahanglana ang pag-usab sa school calendar, kon di ang pag-adjust diay sa mga mga pamaagi sa pagklase nunot kausaban sa panahon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph