Editoryal: Haom sa panahon

Editoryal: Haom sa panahon
Editorial Cartoon by Ariel Itumay

Nagpamahit na ang kainit sa adlaw ning taliabot nga panahon sa ting-init ug ang epekto sa El Niño phenomenon.

Dili maayong tilimad-on alang sa agrikultura ug dakong hagit sa igong supply sa tubig labi na sa Sugbo.

Sa pikas bahin, tungod sa kauga sa palibot haom sa pagpalambo o pagpanglimpiyo sa mga agianan sa tubig sama sa mga suba, kasapaan ug estero.

Maayo usab ang pagpatuman sa mga proyekto ug inprastraktura sa pag-ugmad sa drainage system subay sa master plan.

Mas paspas ang trabaho sa drainage kon uga ang yuta ug gilauman nga pag-abot sa ting-uwan, mokunhod o kaha mawala ang problema sa baha ug lunop.

Sa dakbayan sa Sugbo, dalaygon ang mando ni Mayor Michael Rama sa pagpabalik sa Oplan Disiplina.

Usa ka koordinado ug malangkubong paglimpiyo sa palibot dili lang sa mga agianan sa tubig, naglakip na sa babag sa kadalanan.

Ang Oplan Disiplina gilangkoban sa mga ahensiya sa City Hall ug kapulisan ubos sa pagpangulo sa hepe sa Cebu City Police Office (CCPO) nga si Police Colonel Ireneo Dalogdog.

Usa sa ahensya nga aktibo sa Oplan Disiplina nga ang Prevention Restoration Order Beautification Enhancement (Probe) sa pagpangulo ni Retired Fire General Aderson Comar.

Matod ni Comar, dihang nahinabi sa Superbalita, ang walo ka mga sapa ug suba sa dakbayan ang ilang gitutokan.

Matag suba, dason niya, dunay nagtutok nga ahensiya sa pagtuman sa 3-meter easement, pagpamutol sa sanga sa kahoy ug ubang babag usab sa kadalanan.

Dugang ni Comar, ang Probe nadistino sa Estero de Parian sa pagpangguba sa nakalapas nga koral o estraktura.

Nasayran nga ubang molupyo niuyon sa pagguba niini ug dunay gipaubos sa proseso ug notisya.

Dili kini sayon nga buhat. Dunay niboluntaryo sa pagpaguba apan adunay nagmagahe usab. Busa molanat pa kini og taudtaod nga kampanya.

Maayong gisugdan na kini labi na ning nag­lating pa ang kainit sa panahon. Suportahan nato kini nga kampanya.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph