Editoryal: Hinaot pang matinuod

Editoryal: Hinaot pang matinuod
Editorial Cartoon by Ariel Itumay

Pila na lang ka mga adlaw, mohagtok na ang 2024. Hapit na sab motangkod og 10 ka tuig sukad sa pagpahigayon sa groundbreaking ceremony sa 10 ka andana nga bag-ong Cebu City Medical Center (CCMC).

Ang pagsugod sa pagtrabaho gipahigayon sa Hulyo 2015.

Sila si Mayor Michael Rama ug anhing mayor Edgardo Labella pulos ningsaad sa paghuman sa CCMC sulod sa ilang tagsa ka termino.

Tinguha ni Rama nga sa di pa matapos ang iyang termino sa 2025, mahuman na ang tambalanan. Labing uwahi niyang sulti nga makompleto na ang 10th floor sa Pebrero 2024.

Di kini unang higayon nga nisaad ang ma­yor sa paghuman sa CCMC, apan duna pa diay mga problema. Gani, iya mang gipahunong ang pagpatrabaho sa labing uwahi nga contractor tungod kay wa nakahuman sa iyang target bisan kon wa pa napupos ang kontrata.

Basin ang mayor diretso rang nisaad sa paghu­man sa edipisyo nga way konsultasyon tali sa contractor ug pagsusi og maayo kon wa bay mga problema ug kon naa, masulbad ba ug unsay mga sulbad?

Gikonsulta ba sab kaha sa mayor ang contractor kon mahuman ba kaha niya ang tibuok 10th floor sa kadako sa trabahuon? Basin iyaha ra ni, wa na sab gikonsulta ang nagtrabaho.

Huna-hunaa lang gud, nilanat pa gani og katuigan, naa pa sa 7th floor ang edipisyo sa CCMC, unsa na kaha ang paghuman sa 10th floor? Sayon ra baya kaayo sultihon, apan ang pagbuhat mas lisod.

Hinaot nga ning higayuna matinuod ug matuman na ang sulti ni Rama kalabot sa CCMC. Kay kon mahuman na kini, iya kini nga legasiya kay siya ang nangusog nga matukod kini.

Apan mas maayo tingali nga ipaagi og kahilom sa mayor ang iyang pagpatiwas sa CCMC. Kon hingpit na kini nga mahuman, anha na niya kini ipakita sa publiko.

Makadaghan na nisaad ang mayor, apan kanunay nga pakyas. Hinaut pa nga ning higayuna, tinuod na ang tanan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph