Editoryal: Hinayhinay nga pagpatay sa drugas

EDITORYAL
EDITORYAL

Sulod lang sa usa ka semana nga operasyon sa Police Regional Office (PRO 7), nakasakmit sila og P51 milyunes nga balor sa drugas, labing daghan sa Sugbo.

Matod sa PRO 7 nga daghan ang nasakmit dinhi sa Sugbo tungod kay gihimo na kini nga transshipment point kun agianan sa ilegal nga drugs di lang alang sa Sugbo, kon di sa Kabisay-an ug Mindanao. Apan kon basehan usab ang gidaghanon sa mga nakuha sa gitawag nga mga bodegero, makita nga taas ang demand sa ilegal nga drugas.

Sama niadtong nasikop sa Dakbayan sa Lapu-Lapu ug Dakbayan sa Sugbo nga kinilo ang dala. Di katuohan nga nagdala sila og ilegal nga drugas nga alang usab sa Kabisay-an ug Mindanao. Alang lang kadto sa Sugbo nga ilang ipanghagbong sa mga dapit nga sila ang nag-supply.

Apan di sab tingali tanan iagi dinhi sa Sugbo kay daghan sa mga pantalan dinhi estrikto sa seguridad. Taas og risgo kay sa moagi sila sa mga pantalan sa ubang mga probinsya nga lugak ang seguridad kay way inspection sa mga kargamento. Mao gani nga sagad sa mga nadakpan nag land trip, apan dinhi na na-intercept tungod sa mga buy-bust.

Makita sab hinuon nga epektibo ug maayo na ang intelligence gathering dinhi sa Sugbo kay dagko na nga mga tinubdan sa shabu ang nasikop sa kapulisan. Kadaghanan sab di lang mga street dealer, kon di, high value individual na ang ilang nasikop. Good work sa mga polis.

Ang Philippine Drug Enforcement Agency (PDEA 7) nagsige sab og target sa mga drug den nga usa sa mga hinungdan kon nganong naghitak ang drugas sa kasuokan sa mga barangay. Kadaghanan usab sa mga Barangay Anti Drug Abuse Council (BADAC) aktibo usab hinungdan nga natumbok kining mga durugista.

Apan dako pa kaayo kini nga trabahuon taliwa sa pagsige og adjust sa mga drug dealer sa ilang pagpayuhot og ilegal nga drugas. Gawas pa, posible sab kaayo nga duna gihapoy mga drug protector sa ubang mga barangay ug mga opisyal nangahadlok nga mokombati batok sa mga durugista kon kini nanghulga. Di baya sab lalim ang ilang kapabilidad base sa mga kaso sa pagpatay dinhi sa Metro Cebu.

Apan sa hinayhinay, anam rang maluka ang drugas, sama sa usa ka kahoy nga kanunay pul-ongan sa mga sanga ug anam nga nangaputol ang mga gamot. Sa madugay mamatay ra ang punoan kon ang programa magpadayon ug magmalampuson pinaagi sa kooperasyon sa komunidad, labina sa matag pamilya diin magsugod unta ang kampanya batok sa ilegal nga drugas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph