Ang paghibalik sa Pilipinas ug pagbalhug ni kanhi Kongresista Arnolfo Teves Jr. ngadto sa detention facility sa National Bureau of Investigation (NBI) sa sulod mismo sa New Bilibid Prison (NBP) maisip nga usa ka dakong lakang sa pagkab-ot og hustisya. Human sa duha ka tuig nga pagtagotago, nadakpan siya sa Timor-Leste, ug gi-deport pabalik sa nasud human giingong naghulga sa seguridad ug kalinaw sa publiko ang iyang presensya sa maong nasud. Wa na siya makalikay pa sa gahum sa balaod.
Apan samtang nagsugod na ang legal nga proseso batok sa kanhi kongresista, kinahanglan nga hinumdoman nga ang Teves case dili lang personal nga isyu, kini usa ka barometro sa katakos sa atong sistema sa hustisya.
Si Teves nag-atubang og seryuso nga mga kasong pagpatay ug frustrated murder, lakip na ang giingong maoy utok sa brutal nga pagpatay sa gobernador sa Negros Oriental, Roel Degamo ug uban pang mga inosenteng sibilyan. Dugang pa niini, adunay pa siyay laing kasong pagpatay sa Negros Oriental nga naglakip sa kamatayon ni Miguel Dungog, kanhi board member sa Negros Oriental, niadtong 2019.
Samtang si Teves nipasabot kon nganong nibiya siya sa nasud human siya gipasakaan og kaso. Kini tungod kay nabalaka siya sa iyang kinabuhi ug sa iyang pamilya. Di ba kaha nga sinyales kini nga siya guilty?
Siya nihangyo nga paspason ang proseso kay kon tutokan lang ang kaso dali ra kining matapos, apan ang pagpaspas sa proseso wa magpasabot nga isakripisyo ang integridad sa imbestigasyon ug piskalya. Kinahanglan nga patas, transparent, ug walay pagpanalipod bisan unsa ang dagan sa kaso.
Kini nga kaso usa ka importante nga higayon para sa atong hudikatura, ug alang sa katawhan nga nisalig nga ang hustisya buhi ug anaa gihapon sa Pilipinas. Gipanawagan nga ipadayon ang legal nga proseso nga way paborpabor, mapanalipdan ang katungod sa mga biktima, ug ipadayag nga ang tinud-anay nga hustisya dili mahadlok sa gahum, kwarta, o impluwensiya.