Editoryal: I-banned ang nakapatay sa aksidente

EDITORYAL
EDITORYAL

Bisan 70 anyos na si Joselito Diaz Patalinghug, 70, drayber sa habalhabal, nagmaneho gihapon siya aron makaabag sa iyang pamilya, labina sa mga anak niya ug mga apo. Apan sakit kaayo alang sa pamilya kay niadtong Pasko, sayo sa buntag sa Disyembre 25, siya namatay human madasmagi og sports utility vehicle (SUV) nga gimaneho ni John Mark Argabio nga ni counterflow sa ibabaw sa unang Mactan bridge.

Gituohan nga nakatulog si Argabio samtang nagmaneho. Naigo si Patalinghug sa windshield sa SUV samtang ang pasahero niya nalagpot og gibana-banang 24 metros gikan sa dapit nga gibanggaan. Base sa kuha sa CCTV, kusog ang dagan SUV nga tungod sa kakusog sa impact, maora’g duwaan nga nalagpot ang pasahero ni Patalinghug gikan sa motorsiklo.

Tungod sa grabe nga impact, grabe ang kadaut sa ulo ni Patalinghug ug gituohan nga maoy iyang gikamatyan.

Aksidente, wa tuyoa maoy sagad linya sa mga drayber nga nakadasmag. Wa man gyuy tinuyo. Sa imbestigasyon sa kapulisan sa dakbayan sa Lapu-Lapu, niana pang gabii sa Disyembre 24 giingon nga way tulog si Argabio.

Nganong nimaneho man siya nga way pahuway? O di ba kaha nakatulog kay dunay laing hinungdan?

Matod sa taho, gihatagan ang pamilya sa namatay og kwarta. Kini ra bang kinabuhi sa tawo way katumbas nga salapi bisan minilyon pa ang ihatag.

Unta sa mga drayber, huna-hunaon ba nga ang pagpasagad og maneho sa sakyanan, posible kaayo nga makadaut o makakutlo og kinabuhi kay sama kini sa armas, kon patakaan og gamit, makapatay o makaangol.

Maayo ra’g usa o duha lang ang mga sakyanan nga naa sa dalan. Daghan. Mayoriya dunay mga pamilya nga naghuwat sa ilang pag-uli. Busa, mag-amping. Kon nakainom o way pahuway, matulog una sa di pa mobiyahe nga magmaneho.

Niadtong mga drayber nga nagpasagad ug nakapatay sa aksidente, mas maayo nga i-banned for life sila sa pagmaneho kay hulga sila sa publiko sa karsada. Kon tugtan sila nga momaneho og balik, ang labing minos duha ka tuig nga suspensyon ug pagsugod og balik sa proseso sa pagkuha og lisensya kon madeterminar nga di iyaha lunlon ang kasal-anan.

Gikinahanglan nga mopailawom sila og subsob nga mga seminar sa road safety kay klaro man kaayo nga kuwang sa defensive driving ang mga tawo nga nalambigit og grabe’ng mga aksidente sa dalan.

Ang repeat offenders sa reckless driving maayo sab nga pahamtangan ini nga silot. Gikinahanglan ang bug-at nga silot aron makuhaan ang mga drayber sa karsada nga hulga sa publiko.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph