Ang dakbayan sa Sugbo maoy host sa Palarong Pambansa 2024 karong Hulyo, ang labing dako nga kompetisyon sa paugnat-sa-kusog sa nasod.
Apan ang kalampusan sa Palaro o mabulilyaso, ang tibuok Sugbo maduhig. Nakasugal ang imahen sa mga Sugbuanon sa matag higayon nga dunay dakong kalihukan nga ipahigayon dinhi.
Busa, maayo ang hingit nga suporta sa silingang local government units (LGUs) sa Metro Cebu sa pagseguro nga han-ay, hapsay ug malampuson ang pagpahigayon sa Palarong Pambansa 2024.
Labina karon nga nag-atubang og hagit ang dakbayan sa Sugbo sama nga preventively suspended si Mayor Michael Rama ug si Bise Mayor Raymond Alvin Garcia nilingkod isip acting mayor karon.
Laing hagit mao ang trabaho sa renovation sa Cebu City Sports Center (CCSC) ug ang isyo sa trapiko tungod sa nagpadayong Cebu Bus Rapid Transit (CBRT) project sa Osmeña Blvd, nga duol sa maong venue sa duwa.
Seguro dugang sagubangon sa Dakbayan mao ang dakong budget sa pag-host sa Palaro. Dako og matampo ang kasilinganang LGUs niini.
Busa tukma ug dalaygon ang tigom nga gipatawag ni Gov. Gwendolyn Garcia pipila ka mayor sa Metro Cebu alang sa pagsuporta sa Palarong Pambasa 2024 diin mismo ang Gobernador nisaad og pinansiyal nga tabang.
Samtang, sila si Lapu-Lapy City Mayor Junard Chan ug Mandaue City Mayor Jonas Cortes ningtanyag og venue sa pipila ka mga duwa aron dili na mogamit sa pribadong pasilidad sa mga tunghaan ug mapahimuslan ang mga imprastraktura nga gigastuhan sa kagamhanan.
Gawas nga kaminosan ang kahuot sa dakbayan sa Sugbo atol sa Palaro, ang mga negosyo sa mga silingang LGUs makabenepisyo sa pagpahigayon og mga duwa sa ilang dapit.
Mas lapad nga suporta ug partisipasyon sa LGUs, maghatag og kalampusan sa maisip nga Olympics sa Pilipinas ug mouil sa ilang tagsa-tagsa ka dapit ang mga delegasyon balon ang maayong kasinatian.