Subo paminawon nga nisaka og maayo ang kaso sa human immunodeficiency virus (HIV) tibuok nasod ngadto sa 500 percent base sa pamahayag ang Department of Health (DOH).
Mao nga nagplano ang DOH nga modeklara og national public health emergency aron mapugngan ang dugang pagkatag sa virus.
Matod sa DOH nga matag adlaw gikan sa Enero hangtod Marso ning tuiga, ang ilang buhatan nakatala og 57 ka kumpirmado nga kaso sa HIV.
Sa kasamtangan, ang nasod adunay 148,831 ka aktibong kaso sa HIV.
Kasagaran sa mga nabiktima sa maong sakit nagpangedaron og 15 hangtod 25 anyos ug ang labing bata mao ang 12 anyos nga taga Palawan.
Apan matod sa DOH nga kon dili kini masumpo, ang gidaghanon sa kaso posible’ng molapas sa 400,000.
Mao kini resulta sa unsafe sex, sama sa dili paggamit og condom hilabina kon ang pares sa pakighilawas usa ka commercial sex worker.
Mao nga importante kaayo nga palapdan sa gobiyerno ang information campaign mahitungod sa safe sex aron wala nay daghan’g mabiktima pa niining maong sakit.
Ang targeton sa maong information campaign kadtong mga estudyante sa high school ug college, sanglit kining mga edara magsugod na ni og ibug-ibog ug uyab-uyab.
Ang information campaign usa sab ka pagpasidaan sa mga batan-on nga dili mokumpiyansa ug kanunay nga alerto hilabina kon ang imong partner dili limpyo o ba kaha wala ka kaila.
Kasagaran sa mga nabiktima sa HIV kadtong mga tawo nga inosente o kulang og kaalam mahitungod sa maong sakit o ba kaha makalimot na sa epekto sa HIV kon anaa na sa aktong pagpakighilawas.
Mao nga dili ta mopataka og hamag. Dili ta magpadala kon adunay babaye nga moduol kanato unya motanyag og serbisyo bugti sa kuwarta. Mas maayo nga buhaton ang pagpakighilawas ngadto ra sa atong legal nga asawa aron dili ta mataptan og sakit ug aron dili ta magmahay sa kaulahian kay wala ra bay mahay nga mag-una.