Gumikan aning gitanyag sa Kagamhanan sa Dakbayan sa Lapu-Lapu nga hatagan og P10 mil nga insentibo kadtong mga lalaki nga nag-edad og 20 pataas nga magpatuli, samtang P20 mil sa mga senior citizen, adunay pipila ka mga indibiduwal nga nisanong sa maong hagit.
Tulo ni sila kabuok nga ni-avail sa libre’ng tuli nga gipahigayon sa siyudad niadtong Mayo 20 – usa ka senior citizen nga nagpangedaron og 68 anyos ug duha ka batan-on nga nag-edad og 20 pataas.
Si lolo nakadawat og P20 mil, samtang ang duha ka mga batan-on gihatagan og tag P10 mil. Ang gitanyag sa dakbayan nga insentibo dako og tabang aron madasig ang mga edaran nga magpatuli.
Usa sa mabasol kon ngano’ng adunay mga tawo nga nagdako nga pisot ang ilang mga ginikanan gumikan kay wala sila dasiga nga magpatuli aron unta dili kini ma-bully, hilabina kon moeskwela na sila.
Sa elementarya, kon mahibaw-an ka nga wala pa nagpatuli, tawgon dayon ka sa imong mga klasmeyt og “Pisot, pisot, pisot.”
Kon ang mga ginikanan dili magpakabana ani, modagku gyud ning ilang mga anak nga pisot kay mauwaw na nga magpatuli.
Maayo na lang kay tungod sa programa sa Dakbayan sa Lapu-Lapu nga gipasiugdahan ni Mayor Chan, ang mga edaran na ilang gibatukan ang ilang kauwaw ug nagpatuli gyud.
Importante sab kini kay kon aduna kay maibgan nga babaye, proud na ka nga manguyab og aduna na kay kaisog nga moatubang.
Sa post ni Mayor Chan sa iyang Facebook page, kini nagkanayon “Usa ka 68-anyos nga senior citizen na pud ang misanong sa atong panawagan nga magpatuli kay walay apo ni Lapu-lapu nga pisot.”
Daghan’g netizens ang nikumento sa maong post, pipila niini nagkanayon ‘mas dako ang edad, magkadako sad diay ang award,’ ‘daghan pa gyud diay ang pisot sa Lapu-Lapu,’ ug ‘Ka nindot ba ana mayor naa man pahalipay kon magpatuli oy. Good job mayor ahong chan.’
Kagahapon’g adlawa, Mayo 22, ang maong post nakaani og 5,200 likes, 1,500 comments ug 1,300 shares.
Atol sa libre nga tuli sa Mayo 20, sa Hoops Dome, ang kagamhanan nitanyag sab og libre nga tupi sa mga residente diin sobra sa usa ka libo ka tawo ang nakapahimulos.
Ang susama nga serbisyo gisundan kagahapon’g adlawa, Mayo 22, ug aduna pay usa nga umaabot karon’g Mayo 30 alang sa mga nahibilin’g barangay sa mainland og sa Hunyo 3 sa Mini Hoops Dome sa isla sa Olango.