Naandan sa usa ka asawa nga mo-react kon ang bana kanunay na lang nga sawayon, pribado o atubangan sa publiko. Busa, natural lang ni First Lady Liza Araneta-Marcos nga mopadayag sa iyang kasuko ug kasagmuyo kang kanhi Presidente Rodrigo Duterte nga nihingalan kang Presidente Ferdinand “Bongbong” Marcos Jr. nga drug addict, “bangag” sa ilegal nga drugas.
Nunot sa iyang gibati, iyang giangkon nga wa na siya nanagad kang Bise Presidente Sara Duterte kay nasakitan siya sa gipanulti sa amahan nga Duterte.
Apan si VP Sara niingon nga di na lang tubayan ang gisulti sa First Lady kay mas importante ang pag-una sa pagsulbad sa mga problema sa nasod. Pasagdan na lang sila nga mag-estorya sa pribado.
Ang nasakitan ni Araneta-Marcos kay ang iyang bana nanalipod kang kanhi Presidente Duterte, apan bisan sa gibuhat sa iyang bana, gidaut gihapon kini sa kanhi pangulo atubangan sa publiko.
Showbiz na kaayo ang dagan sa mga estorya kalabot sa Presidente ug Bise Presidente taliwa sa kadaghan sa mga problema sa nasod. Nanghasi ang grabeng kainit sa panahon nga nakaingon sa paghubas sa kasapaan ug pagkadaut sa mga lagutmon. Mius-us man tuod ang mga krimen, apan nagpadayon ang problema sa illegal drugs sa mga suok sa nasod.
Naa pa ang problema sa West Philippine Sea (WPS) nga gikasungian sa Pilipinas ug China. Suliran sab ang pagpalambo sa nasod aron unta mominos pa ang gidaghanon sa way trabaho ug mosaka ang gidaghanon sa mga negusyo nga maoy kinabuhi sa kagamhanan. Minos ang negusyo, minos ang pundo. Minos ang pundo, way hapit mahimo nga proyekto, labina kuhaan pa sa mga kiriwan sa kagamhanan.
Inay maghisgot aning mga away nga may labot sa politika, ipadaplin na lang unta ni. Mao nga naglisod ang paglambo sa nasod tungod kay kanunay nakatutok sa personal nga mga isyo, nga kasagaran bunga sa mabdos nga imahinasyon.