Editoryal: Isyo sa CBRT ‘nanglupad’

Editoryal: Isyo sa CBRT ‘nanglupad’
Editorial Cartoon by Ariel Itumay

Unsay kapalaran nga nagpaabot sa Cebu Bus Rapid Transit (CBRT) project?

Usa pa ka hugna o package 1 sa upat ka hugna nga proyekto ang gisugdan, apan mga isyo nag-aso-aso, daghang ningsawo ug nanglupad na bisan asa.

Ning ulahi, ang Kapitolyo nanginlabot. Nanawagan kini sa paghunong sa katukoran sa bus terminal sa CBRT duol sa dapit nga ‘nagbabag’ sa makasaysayanong edipisyo sa Lalawigan.

Ang Hunta sa Probinsiyal nipalabang usab og resolusyon sa Lunes, Pabrero 4, 2024, sa paghunong sa CBRT project tungod sa daghang mga kuwestiyon niini.

Kini nga lakang sa Kapitolyo nalantawan nga mopasamot sa samad sa relasyon sa liderato ni Gob. Gwendolyn Garcia ug Mayor Michael Rama sa Dakbayan sa Sugbo.

Si Rama niluwat na og bug-at nga pamahayag sa unang higayon batok kang Garcia nga dili manghilabot sa dakbayan.

Samtang, ang mga opisyal sa Dakbayan sa Sugbo nagkaguliyang. Ang Konseho nipalabang og resolusyon nga dili ipadayon ang pagtrabaho sa mosunod nga packages sa proyekto.

Si Konsehal James Cuenco, chairman sa komitiba sa transportasyon sa Konseho, niingon nga humanon una ang package 1 nga nakamugna sa pagkabalda sa trapiko sa Osmeña Blvd.

Buot usab si Cuenco nga matubag ang tanang mga isyo lakip sa timeline sa trabaho tungod sa kalangay mismo sa package 1.

Karon si kanhi mayor Tomas Osmeña nagsugod sa pagpaaprubar sa CBRT project, nitingog ug nisaway sa Kapitolyo labina sa pag-angkon sa pipila ka mga luna, matod pa, bisan donasyon sa iyang apohan.

Nalangay na og napulo ka tuig ang CBRT project. Gani, gikan sa P16.3 bilyunes nga balor sa proyekto, nahimo na karon nga P28.78 bilyunes sa kadugay sa pagsugod niini.

Gubot ang dagan sa CBRT. Kontrobersiyal. Daghan nang napagan sa pagpanglupad sa isyo. Mahuman ba kaha kini?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph