Editoryal: Kaakuhan sa kaluwasan

EDITORYAL
EDITORYAL

Way inpormasyon ang kapulisan sa dakbayan sa Sugbo bahin sa ‘hulga sa seguridad’ sa kapistahan ni Sr. Sto. Niño ug Sinulog Festival karong Enero 21, 2024.

Apan matod ni Police Lieutenant Colonel Janette Rafter, deputy city director for operations sa Cebu City Police Office (CCPO), ilang gipatuman gihapon ang hugot nga seguridad.

Sama sa pagdili sa pagdala og daghang bags ug backpack sud sa mga simbahan labina sa Basilica Minore del Sto. Niño.

Gawas pa, gipasabot ni Rafter nga kon magdala og dagko nga bag ang mga manimbahay, makalangay sanglit susihon kini sa mga polis ug sa mga gwardya sa simbahan.

Giluwatan kini nga mando human nabantayan sa kapulisan nga daghan na ang mga lokal ug langyaw nga turista nga nangabot alang sa kapistahan.

Busa, iyang gipasidan-an ang mga bisita nga gikan sa laing lugar sa Pilipinas nga ipahimutang lang una ang ilang mga bagahe sa dapit nga ilang gipuy-an o hotel.

Lakip sa gitutokan sa kapulisan ang pagsu­­god sa nobinaryo sa Basilica ug paglatid sa mga gidili atol sa solemn procession sama sa pagpalupad og balloons nga risgo nga mosangit sa linya sa kuryente.

Komon usab ning panahona ang pag-abot sa mga dautang elemento gikan sa ubang dapit sa nasod aron pagpahimulos sa panagduot sa daghang tawo labina atol sa adlaw sa pista.

Sa nangaging katuigan, natala ang pagsaka sa kaso sa pagpanguot, labi na, tulis, pangilad ug uban pang kriminalidad.

Dalaygon ang pagpangandam sa kapulisan apan, ang isyo sa seguridad dili lang nakasandig sa tahas sa awtoridad.

Kita, labina na ang mga molupyo sa dakbayan, maoy dunay dakong kaakuhan mismo sa atong kaluwasan ug pagpanalipod sa atong mga bisita.

Atong garbo nga mouli ang mga bisita sa ilang tagsatagsa ka dapit balon ang nindot nga kasinatian ug malinawon nga pista sa Sugbo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph