Editoryal: Kabilin nga bahandi

EDITORYAL
EDITORYAL

Niining panahon sa ting-graduation nga nagsugod sa hinapos nga bahin sa Mayo ug sayong bahin sa Hunyo, garbo sa ma­tag ginikanan nga mosaksi sa kalampusan sa ilang mga anak sa pagtungha sa nagkadaiy’ng level sa edukasyon: preparatory, elementary, secondary ug tertiary.

Dili lang kini kalampusan sa ma­tag tinun-an apan timaan sab kini sa sakripisyo ug pagpaningkamot sa matag ginikanan o guardian sa katuyoan nga mahatagan og maayong ugma ang mga anak pinaagi sa pagpatungha.

Susama sa usa ka security guard sa Lapu-Lapu City Auditorium, ang venue diin gipahigayon ang graduation ceremony sa tunghaan sa iyang anak babaye.

Naghatag og inspirasyon sa kadaghanan ang eksena diin nananghid si Eduardo Amancio nga mo-break sa makadiyot sa iyang detailed post, kay mosaka sa stage aron sa pagtaod sa medalya ug ribbons sa iyang 17 anyos nga anak nga si Lorifel Amancio nga mitapos sa Grade 11.

Nasayran nga si Eduardo sud na sa 24 ka tuig nga security guard, minyo, taga-Barangay Basak, Lapu-Lapu City ug adunay lima ka mga anak.

Nag-viral ang ilang picture diin makita si Eduardo naka-uniporme pa sa pagka-security guard diha sa stage, tupad sa iyang anak nga nagsalib-ay og medalya ug ribbons, adunay bitbit nga certificate.

Ang maong picture naghulagway sa kadaugan nga taliwala sa mga kalisdanan, kalisod o pagsuway, uban sa panghinaot nga panaminan sa ubang kabataan nga maninguha sab aron ma­kab-ot ang ilang pangandoy.

Base sa panultion nga ang edukasyon bugtong bahandi nga ikabilin sa mga ginikanan ngadto sa ilang mga anak nga dili mailog sa lain.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph