Nangreklamo ang mga vendor Cebu City Fish Market (kanhi Pasil Fish Market) sa kakuwang og pansayan sa pasilidad nga gidumala na sa Kagamhanan sa Dakbayan sa Sugbo bisan tuod kon ang nitukod niini mao ang Dept. of Public Works and Highways (DPWH 7).
Ang pasilidad nga nagbarog sulod sa Brgy. Suba gibuksan sa Kagamhanan sa Siyudad sa miaging tuig taliwa sa reklamo sa kahugaw sa dapit nga “Bagsakan” sa mga isda sa South Road Properties (SRP).
Angay nga tagdon kini nga reklamo sa mga naa sa merkado tungod kay makauulaw kaayo ni sa Kagamhanan sa Siyudad nga naila nga rayna sa habagatan ug nagtinguha sa Singapore-like nga estado sa siyudad unya wa nakaatiman ning labing dako nga fish market sa siyudad, kon di man gani, sa tibuok isla sa Sugbo.
Ang wa nasayod, nagtuo nga responsibilidad kini sa Brgy. Suba, apan naa man tuod kini nagbarog sa ilang barangay, ang pagmintinar sa imprastraktura ug sa palibot iya sa Market Operations Division sa Siyudad.
Kahibulongan usab kon nganong way pansayan ang edipisyo nga unta importante man kini kaayo. Sa pagtukod niini wa diay ilakip og seguro ang mga pansayan sa mga lalaki ug babaye?
Wa diay ni mahuna-huna sa kagamhanan ang kaimportante sa pansayan sulod sa merkado nga unta naa may mga stall nga gipamutang? Kon dunay stall, dunay vendors. Kay merkado, dunay mamalit.
Balido kaayo ang reklamo sa mga naggamit sa merkado kada adlaw. Di kini angay nga palingugngogan lang o magpabungolbungol ang market officials o ang city officials mismo nga gipangulohan ni Mayor Michael Rama.
Kalisod baya huna-hunaon nga ang mga naa sa merkado nanginabuhi moadto pa og mga balay aron paglabay sa hugaw. O ang mga lalaki anha lang mangihi sa tampi sa dagat.
Ang problema gikinahanglan nga tagdon ug hatagan og solusyon. Samtang wa pa, di kaha maayo nga butangan og temporaryo nga portalet ang dapit?