Editoryal: Kainit sa panahon ug politika

EDITORYAL
EDITORYAL

Ning nakalabay nga mga adlaw sa Enero, nag-anam og kanihit ang uwan nga timaan sa pagsugod na og epekto sa El Niño. Makauwan man gani maora lang og nagbisibis og makadiyot.

Di pa ni mao kay gipaabot nga sa mosunod nga tulo ka mga buwan magkakusog ang El Niño, matod sa Philippine Atmospheric Geophysical Astronomical Services Administration (Pagasa).

Lahi sa miaging tuig nga maorag danawan sa kabaw ang South Road Propeties (SRP) samtang nag-angat pa ang Sinulog 2023, karon tuiga kay makapagtong ang kainit. Naay mga dancer nga nakuyapan sa tumang kaluya tungod sa kainit.

Busa taliwa ning tanan, mapaabot na sab ang hinayhinay nga pagminus sa supply sa tubig sa Metropolitan Cebu Water District (MCWD) labina sa surface water, kun kanang gikan sa kasapaan tungod sa huwaw. Kon basehan ra ba ang nangagi nga mga huwaw, hubsan sa tubig ang kadaghanan sa mga sapa dinhi sa Sugbo.

Dinhi unta mosulod na ang tubig gikan sa desalination plants nga wa nagsalig sa tinubdan sa tubig gikan sa ilawom sa yuta ug kasapaan. Hinaut pa nga ang gisudlan nga mga kasabutan sa MCWD tali sa water suppliers di maapektuhan sa away karon tali sa water firm ug administrasyon sa Cebu City Hall.

Dako kaayo ang nag-ung-ung nga problema sa tubig sa umaabot nga mga buwan. Apan unsaon kaha pag-atubang sa mga opisyal sa suliran kon ang kainit sa politika sulod sa City Hall monunot usab sa grabeng kainit sa panahon?

Sa pagkakaron, maayo ang dagan sa water firm taliwa sa pagpiit kanila sa Siyudad tungod sa kasungian tali sa MCWD board nga gipangulohan ni manlalaban Joey Daluz ug Mayor Michael Rama.

Nakatutok pa man ang mayor sa Sinulog 2024 sa miaging mga adlaw, hinaot nga di na sab niya uyogon ang mao nga buhatan samtang pasagdan kini sa pagsagubang sa umaabot nga dako nga suliran sa supply sa tubig.

Kinsa bay makatutok sa problema kon dunay legal nga mga gapos ang mga kamot sa mga opisyal sa pagsulod og mga kasabutan ug kontrata nga gitumong sa pagsulbad sa kakuwang sa supply sa tubig?

Daghan ra ba kaayo og suliran ang Siyudad, nag-una ang kahuot sa trapiko ug grabeng guba sa mga karsada. Maayo ni nga tutokan, inay magmugna na sab og laing suliran nga hayan mosangko sa grabe pang umaabot nga krisis sa tubig. Lisod na magkuyog ang kainit sa politika ug kainit sa panahon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph