Karong adlawa, Lunes, Hunyo 16, 2025 mao ang pagsugod sa klase sa tibuok kapupod-an alang sa School Year 2025-2026, nga gibalik sa naandan niining petsa sa kalendaryo sa wala pa nahitabo ang pandemic.
Milyunes nga mga estudyante ang labing seguro, naghinamhinam na nga mosulod pagbalik sa tunghaan aron mahimamat pagbalik ang mga kahigalaan ug bag-ong mahimong mga klasmeyt.
Kining tinuig nga kalihukan, dili ikalimod, usa ka ka dakong hagit alang sa kalinaw ug kahusay kay gilauman nga mosiaw ning panahuna ang mga badlungon sa katilingban.
Anaa kini sa alimpatakan sa Philippine National Police (PNP) ug ningpadayag na kini og kaandam aron mapanalipdan ang publiko hilabi na ang mga estudyante gikan sa mga dautan.
Sa usa ka komprehensibo nga pamahayag, gilatid sa PNP ang usa ka lig-on nga plano aron maseguro ang kaluwasan ug kaayuhan sa komunidad sa eskwelahan.
Ang PNP ningpahibalo nang daan nga magpakatap kini og 37,740 ka police personnel aron magbantay sa 45,974 ka pampubliko ug pribadong mga tunghaan sa tibuok nasod.
Magbutang ang PNG og 5,079 ka Police Assistance Desks (PADs) duol sa mga eskuwelahan aron makaabag sa mga estudyante, ginikanan, ug staff sa eskwelahan ug mas palapdan pa sa PNP ang police visibility hilabi na sa mga lugar nga delikado.
Si PNP Chief Police General Nicolas Torre III nipasalig nga makigtambayayong ang ilang ahensya sa Department of Education, local government units, ug ubang partner agencies alang “Oplan Balik Eskwela.”
Usa kini ka mahinungdanong lakang aron mopatigbabaw ang kalinaw ug kahapsay ning panahon sa tingklase.
Ang pagsalmot sa PNP sa Brigada Eskwela 2025 nagpakita sa ilang dedikasyon ug kaandam nga mahimong aktibo nga kaabag sa mga tunghaan.
Naglihok nang daan ang PNP bisan nagpaingon pa lang ang pagsugod sa klase ug ang taho nga hapsay ug wala’y dili maayong insidente nga nahitabo usa ka testamento nga epektibo ang pagplano ug pagpatuman sa PNG kabahin sa kahapsay ug kalinaw.
Apan ang hingpit nga kalampusan sa "Oplan Balik-Eskwela" dili lang magdepende sa presensya sa kapulisan, gikinahanglan sab nga alerto ang komunidad sa kanunay.
Nanawagan ang PNP sa publiko nga kon adunay mabatyagan nga kadudahan nga mga kalihukan, isumbong dayon kini sa awtoridad.