Editoryal: Kalipay, kabalaka

Editoryal: Kalipay, kabalaka
Editorial Cartoon by Ariel Itumay

Isip unang adlaw karon sa tuig 2024, dili malikayan nga daghang mosantop atong sa hunahuna, unsay nagpaabot kanato ning tuiga?

Nalipay kita nga nakaabot ug nakasaksi sa pagpakli sa laing panid sa kasaysayan sa kalibutan.

Sa pikas bahin, dunay kabalaka tungod sa mga hagit ug pagsulay nga nagpadayon nga nahimo nga kabahin sa pagpakabuhi.

Sama pananglitan sa nagsaka nga presyo sa mga nag-unang palaliton apan, walay tino nga umento sa kinitaan.

Mga krimen nga nahitabo sa palibot. Moha­tag usab og komplikasyon sa sitwasyon mao ang kalit nga pag-abot sa mga kalamidad ug sakit.

Wa kitay mahimo gawas sa pagsalom sa ka­matuoran. Molihok aron dili mosamot kaunlod sa kalisod - diskarte ug maningkamot.

Taliwala ning tanan, mangita og inspirasyon ug kanunay mokiling sa positibong aspeto sa mga panghitabo aron dili mawad-an sa paglaum.

Usa sa makapadasig mao ang tamdanan o giya nga hayop sa tradisyon sa mga Insek diin niila sa 2024 isip Tuig sa Wood Dragon.

Ang kalendaryo sa Bag-ong Tuig sa mga Insek gikatakda pa sa Pebrero 10.

Kon nuntan kini, malaumon ning tuiga tu­ngod sa simbolo sa Wood Dragon nga nagre­presentar sa kalig-on, bahandi ug kalampusan.

Ug sayod kita nga dili kini hulog lang gikan sa langit nga atong puniton, apan ubanan usab sa paglihok ug paningkamot.

Labaw sa tanan, mag-ampo kita sa Labaw’ng Makagahom nga hatagan kita og grasya diha sa atong pagpanarbaho, pag-uma ug negosyo.

Manghinaot kita nga motunhay ang kalinaw ug kaangayan sa 2024 dinhi sa atong dapit ug ubang bahin sa kalibutan nga nasamok sa miaging tuig.

Sa personal nga bahin, biyaan na ang dautang bisyo, dili maayong pamatasan ug ipatigbabaw ang gugma sa usa’g usa.

Matod pa, walay bili ang pagbag-o kon dili ubanan og mga pag-ampo.

Malipayong Bag-ong Tuig!

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph