Natubag na ang tanang pangutana kon kinsa ang magkauban sa Mayo 2025 midterm elections human sa pagtapos sa filing sa cerficate of candidacy (COC) niadtong Martes, Oktubre 8, 2024. Kadaghanan nagkompirmar sa daan nang hugonhugon nga daganan o bahin sa panag-uban sa linya apan dunay nakasurprisa human sa filing sa COC. Pananglitan sa Dakbayan sa Lapu-Lapu, si Paz Radaza buot mobalik sa pagka mayor apan dili si Mayor Junard ‘Ahong’ Chan maoy iyang direktang makontra.
Ang asawa ni Ahong nga si Lapu-Lapu Lone District Reps Cindy Cindi Chan maoy modagan sa pagka mayor samtang, si Ahong ni-file para sa Kongreso.
Sa Dakbayan sa Mandaue, si Jonkie Ouano maoy mikandidato sa pagka mayor human nitapos ang iyang termino isip representante sa 6th District sa Provincial Board. Si Jonkie makigharong sa gitaktak sa Ombudsman nga si Mayor Jonas Cortes, kinsa wala mosibog bisan sa iyang pagsuspenso ug pagkataktak sa serbisyo.
Sa Dakbayan sa Sugbo, ang plastada sa matag grupo o partido migawas na kini sa unang hugonhugon. Nasilyohan na lang human ni-file sa COC.
Sa Lalawigan sa Sugbo, si Gob. Gwendolyn Garcia matawag nga may klaro nga kaatbang human ang ni-file og COC walay klaro nga grupo sa politika. Kini matawag nga yanong kadaugan na usab ni Garcia sa iyang pagpapili sa pagtapos sa iyang termino sa pagka gobernador. Apan sama sa nangaging piliay, walay tino gihapon siya nga running mate o bise gobernador.
Kumusta ang ubang dapit sa lalawigan ug nasod? Seguro dili halayo sa sitwasyon sa Metro Cebu. Manghinaot lang kita nga magpadayon nga malinawon labina sa pagsugod sa campaign period hangtod sa adlaw sa piniliay sa Mayo 2025.