Sayo sa miaging tuig, ang nagdumala sa Cebu Bus Rapid Transit (CBRT) construction nibana-bana nga mahuman kini sa Disyembre. Dayon nairog og Enero ug nahimo na sab nga Pebrero karong tuiga.
Dayon niingon nga sa first quarter na sab ning tuiga. Apan karon, Hulyo ning tuiga ang target nga mahuman kini nga phase. Ang istruktura lang ni, ang buses nga gamiton wa pa gani klaro.
Mao ni ang gibutyag ni Cebu City Councilor James Cuenco atol sa interbyo nila ni Mildred Vadal Galarpe ug Rolando R. Morallo sa matag udtong oneline nga programa sa Superbalita Cebu ug SunStar Cebu nga Beyond the Headlines.
Sa 2025 unta gani ang target nga mahuman ang tanang packages sa CBRT, apan nairog na sab kini sa 2027 ug duna pay nadugang nga gasto nga naa sa labing minos P1 billion.
Basta proyekto gani sa kagamhanan, di na ikahibulong ang kalangay kay bisan gani sa yano nga karsada nga sayon rang ayuhon, molapas gani og pipila ka mga buwan. Unsa na kaha ning CBRT? Ang pagguba sa duha ka sykwaylks nga naigo sa project gilalisan pa. Bag-o lang ni gisugdan sa pagguba.
Gusto na sab gani sa pipila ka mga konsehal nga ipahunong ang trabaho niini kay mas nakahasol sa mga motorista ug publiko.
Ang kahasol gipaabot na tungod kay naglagbas kini sa dagkong mga karsada sa dakbayan. Nisamot ang kahasol kay grabe kahinay sa trabaho. Ambot kinsa ang nakalangay, ang kagamhanan ba o ang contractor?
Di tingali contractor kay kini sab sila mapahamtangan man og silot nga pinansyal kon dunay proyekto nga malangay pagtrabaho. Apan masilutan ba sila kon di sila ang nakalangay, kon di ang kagamhanan, sama sa wa pagtuman sa schedule sa pagbayad? Nalangay ba.
Naa gani pipila ka mga karsada sa Brgy. Capitol Site, Dakbayan sa Sugbo nga wa nagkadimao tungod kay wa nahuman bisan gisugdan ni og trabaho mga tulo ka tuig na ang nakalabay.
Busa kaning CBRT atoa na lang paabuton nga di ni mahuman sa gitakdang panahon sa kagamhanan sa 2027. Basin mahuman na lang ang termino ni Presidente Ferdinand Marcos Jr. o mapahigayon na lang ang tulo ka elections, di pa ni mahuman.
Basta kagamhanan gani ang magdumala sa proyekto, hinay pa sa bao ang trabaho. Nganong ang dagkong mga proyekto nga ubos sa public-private partnership paspas man ang paghuman, sama sa Cebu-Cordova Link Expressway? Naa pay portion sa proyekto nga nag-una sa schedule.
Sa ato pa, di maayo og project management ang kagamhanan mao nang palpak? Di ba?