Nag-viral ang video sa mga bata, usa kanila, naghingos og rugby samtang nagsakay og PUJ paingon sa downtown sa Cebu City.
Di kini talagsaon nga talan-awon tungod kay naandan na kini sa pipila ka kadalanan sa dakbayan sa Sugbo. Kadaghanan sab ani nila manghingos ilawom sa mga taytayan, diin sila nanago ug namuyo.
Unsa man kini nga problema? Polis ba o sa local government unit (LGU).
Tahas sa kapulisan ang pagbantay nga di makahingos og rugby kining mga bataa ingon man ang pagbadlong. Bisan gani ang mga opisyal sa dapit diin sila nagtambay, gimbuhaton usab sa barangay ang paghipos aning mga bataa tinambayayungan sa kapulisan ug Dept. of Social Welfare and Development (DSWD).
Kinahanglan nga ang LGU ug ubang stakeholders magtambayayong aron kining mga bataa matangtang gikan sa kadalanan pinaagi sa pagbutang kanila og klaro nga institusyon nga makaatiman kanila. Di lang kay ang Cebu City ang mohimo og lakang alang sa katukoran niini, kon di, apil na ang ubang mga LGU sa Metro Cebu.
Kay pinasagdan man kini sila sa ilang mga pamilya kon naa man, mas maayo pang magtukod og pasilidad nga butangan kanila samtang wa pa sila makahimo og krimen, diin sila mahimo ra sab nga makatungha sa sulod, lahi, layo sa ubang kabataan.
Mangayo og abag sa pribadong sektor, labina sa mga magpapatigayon, aron matukod kini nga di lang alang sa kabataan sa Cebu City, kon di sa ubang mga dapit sa Sugbo.
Kay kon pasagdan kining mga bataa sa kadalanan, sila ang umaabot nga mga kriminal kay maimpluwensya na sila sa palibot. Suma gud, di ba ang mga durugista naghimo og mga runner nga menor tungod kay di mahilabtan sa kapulisan?
Pila na sab ka mga menor nga duna nay mga kaso nga murder nga gisulod sa Operation Second Chance sa Cebu City? Ang uban kanila duna nay kaso nga abuso ug drugs.
Ang karsada ingon sa nahimo nga tunghaan sa mga kriminal. Bata pa lang sila, nagkat-on na.
Nasayod ang kagamhanan niini. Apan ingon sa ang gitutokan og maayo mao ra ang kabataan nga nangabiktima sa pangabuso. Di ba usab diay sila mga biktima sa sirkumstansya tungod kay gipasagdan lang sila sa ilang mga pamilya?
Panahon na nga ilhon kini nga dako nga problema nga nagkinahanglan og hiniusa nga lakang, sa nagkadaiyang mga buhatan sa kagamhanan ug pribadong sektor.
Kay mosugot kita o di, umaabot silang hulga sa katilingban kon mahingkod na.