Editoryal: Kasumaran sa SunStar Cebu

Editoryal: Kasumaran sa SunStar Cebu

Nobiyembre 25, karon usa ka halandumong adlaw sa SunStar Cebu tungod sa kasaulogan sa iyang ika-41 nga kasumaran sa pagkahimugso. Sulod sa kapin sa upat ka dekada, kini ang nag-unang daily community newspaper sa pinulongang Iningles sa dakbayan sa Sugbo.

Ang SunStar Cebu nahimong tinubdan sa patas, kasaligang taho, pintok nga opinyon, ug dekalidad nga pagpanuwat hinungdan nga nakadawat og daghang mga pasidungog gikan sa lokal, nasyonal ug international award-giving body o mga organisasyon.

Sa iyang naangkong dungog ug pagtahod, ginuntan kini sa daghang mga bumabasa ug gihugopan sa advertisers nga lig-ong nagsuporta sa iyang maayo nga dagan sa operasyon. Tungod niini, ang SunStar Cebu misalingsing og laing mga produkto sa publikasyon.

Usa niini ang giila nga ‘phenomenal’ sa iyang pagkahimugso sa Superbalita Cebu, ang nag-una sab nga inadlaw-adlaw nga mantalaang Binisaya sa Sugbo sukad niadtong 1994 ug nagpabiling lig-on hangtod karon.

Ang SunStar Cebu maoy unang nationwide network sa community newspaper sa Pilipinas human niabli sa daghang sanga sa community papers sa mga nag-una ug sentrong dakbayan sa nasod. Usa ka konsepto nga gisunod sa ubang mantalaan nga nagbase sa kaulohan.

Nahimo kining tanan tungod sa lantip nga panghunahuna ug bisyonaryo nga nagkaplag o founder sa mantalaan, Atty. Jesus ‘Sony’ Garcia Jr., uban sa pagtimon sa newsroom o editorial department ni Atty. Pachico Seares, ang unang editor in chief sa SunStar.

Apan dili sayon ang panaw sa SunStar Cebu sa matag hugna sa panahon. Dili ikalimod nga kaluha kanunay ang daghang hagit sa kinabuhi, labina ning ulahi tungod sa pag-uso sa social media nga nahimong dakong kakompetensiya sa tradisyonal nga media.

Taliwala ning tanan, ang SunStar Cebu uban sa iyang igsuong publikasyon nakahimo sa pagsakay sa mga balod sa kapalaran. Misagop sa kabag-ohan sa plata-porma sa teknolohiya komunikasyon samtang mas nipalig-on sa naandang mantalaan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph