Editoryal: ‘Katapusan’ sa CV sa Palaro?

Editoryal: ‘Katapusan’ sa CV sa Palaro?
Editoryal

Makahuloganon alang sa delegasyon sa Central Visayas (CV) ang 2024 Palarong Pambansa nga ipahigayon dinhi sa dakbayan sa Sugbo sa Hulyo ning tuiga.

Hayan kini ang kataposan nga panaghuisa sa naandan nga mga sakop sa CV nga gilangkuban sa mga atleta gikan sa mga dakbayan ug mga lalawigan sa Sugbo, Bohol, Negros Oriental ug Siquijor.

Ngano? Napasar na ang balaod sa pagtukod sa Negros Island Region (NIR) nga nag­hiusa sa Negros Occidental nga nahisakop sa Western Visayas ug Negros Occidental ug Siquijor nga pulos mga sakop sa CV.

Nagpabilin sa CV mao na lang ang Sugbo ug Bohol. Tataw nga mausab na ang Central Visayas Regional Athletic Association (Civraa) meet sa sunog tuig alang sa Palarong Pambansa.

Segurado nga makibhangan ang mga halapad nga kapilian nga mga atleta nga mosangka sa dako nga nasudnong kompetisyon nga kuhaan usab og mga magduduwa alang sa Olympics.

Sa pikas bahin, dunay positibo usab nga epekto o benepisyo sa pagkatukod sa NIR sa natad sa sports. Mas makatutok na ang rehiyon sa pagpangita ug paghashas sa mga atleta human migamay na lang iyang nasakupan.

Gawas nga duol lang kaayo ang mga isla sa Sugbo ug Bohol, daghang maayong atleta sa CV gikan sa naasoy nga lalawigan nga nadala sa Palarong Pambansa.

Busa maisip nga emusyonal ang panaghisa sa mga atleta sa karaang CV sa 2024 Palarong Pambansa nga dinhi pa mahitabo sa rehiyon.

Mga panghinaot nga magmalampuson ang Palarong Pambansa sa Hulyo dinhi sa atong dapit. Lakip sa panghinaut nga magmadaugon ang delegasyon sa CV nga hayan katapusan nga panag-uban sa karaang gisakopan sa rehiyon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph