EDITORYAL
EDITORYAL

Editoryal: Katawhan angay masayod

Kinahanglan nga masayod ang katawhan sa mga plano, pagpatuman ug dagan sa matag proyekto sa kagamhanan, labi na kon dako kini og gasto.

Dili lang tungod kay ang salapi nga magamit sa proyekto gikan sa buhis sa katawhan, kon di alang usab sa pagkuha sa ilang suporta alang sa kalampusan sa proyekto.

Angay lang nga masayud ug makasabot sa hingpit ang katawhan nga maoy tumong sa serbisyo. Sa laktod nga pagkasulti, dayag nga impormasyon.

Pananglitan sa gisugdan nga pagtrabaho nga Cebu Bus Rapid Transit (CBRT) project nga niburot ang budget karon sa P28.78 billion gikan sa P16.3 billion sa pag-aprub niini 20 ka tuig na ang nakalabay.

Sa pagkakaron, ang Package 1 (Cebu Capitol ngadto sa Cebu South Terminal) sa CBRT project daghang nagtumaw nga isyo, lakip sa kalangay na usab sa maong package.

Niabot sa punto nga pipila ka mga sakop sa Konseho sa dakbayan sa Sugbo ang nanawagan sa paghunong sa CBRT project tungod sa giingong ‘daghang simtomas’ nga nalantawang kapalpakan sa proyekto.

Apan ang grabe nga reklamo nga atong madungog gikan sa mga sumasakay sa publikong sakyanan nga nahasol sa dugang trapiko mugna sa CBRT project.

Samtang, komon usab ang nga pagtuo nga ang CBRT gihimo alang sa pagsulbad sa nagkagrabe nga trapiko sa dakbayan.

Usa ka batid sa urban planning nga nahimong kabahin sa pagduso sa CBRT project niingon nga dili tumong niini ang pagsulbad sa trapiko apan paghatag og paspas, luwas ug komportableng transportasyon sa masa o mayoriya sa katawhan nga way sakyanan.

Sayop diay ang pagtuo sa kadaghanan? Dili ba usab kaha nga mao kini ang pagtuo sa ubang mga opisyal?

Dili nato masabol ang maong pagtuo human walay igong komunikasyon ug pagpahibalo ang mga opisyal ug hingtungdang mga ahensiya sa kagamhanan nga nagpatuman sa maong proyekto.

Related Stories

No stories found.
SunStar Publishing Inc.
www.sunstar.com.ph