Naalarma na ang kadagkuan sa Metropolitan Cebu Water District (MCWD) tungod sa nagsaka nga mga kaso sa kawat sa ilang mga metrohan sa tubig sa tibuok nilang franchise area.
Ang datos nga gipahibalo sa MCWD mao kini: 174 ka water meter ang gikawat niadtong Mayo 2025, tulo ka pilo kon itandi sa miaging tuig sa susamang panahon.
Ug sa unang napulo pa lang ka adlaw sa Hunyo 2025, nakatala na sila og 116 ka kaso. Kini nagpakita nga ang problema nagkakusog ug nagkinahanglan og dinalian ug hiniusa nga aksiyon.
Makita sa datos nga ang Dakbayan sa Lapu-Lapu ang labing apektado nga dunay 62 ka kaso sa kawat niadtong Mayo. Gisundan kini sa Cebu City (49), Talisay City (43), Cordova (16), ug Mandaue City (4).
Kini nagpasabot nga ang mga kawatan naglihok sa nagkalainlaing lugar, ug ang ilang modus operandi mura'g organisado.
Dili kini insidente lang, kondili usa ka seryosong krimen nga makaapekto sa liboan ka konsumidor sa tubig.
Ang MCWD nitanyag og P25 mil nga ganti alang sa makahatag og impormasyon sa mga mamalitay og kinawat nga metro nga moresulta sa pagkasikop, ug laing P10,000 sa makatabang sa pagdakop sa mga kawatan.
Kini usa ka maayong lakang aron maawhag ang publiko nga moabag sa pagpangita sa mga responsable.
Gipadad-an sab sa MCWD ang Police Regional Office 7 og sulat aron matabangan sila sa pagsulbad sa maong mga kaso.
Si Police Lieutenant Colonel Maria Theresa Macatangay, deputy city director for operation ug kasamtangang information officer sa Cebu City Police Office, nibutyag nga mopadala sila og mga imbestigador sa opisina sa MCWD.
Giila niya nga ang kawat sa metro sa tubig dili bag-o nga isyu, apan gipasalig niya nga paningkamutan nilang masulbad kini.
Ang awhag sa MCWD sa publiko nga motabang sa pagbantay ug mo-report dayon kon duna silay makit-an nga nangawat og metro sa tubig pinaagi sa ilang hotline nga 254-8434 local 0 o sa ilang Facebook page Metropolitan Cebu Water District (MCWD).
Kinahanglan sab nga makig-alayon ang Philippine National Police (PNP) ug MCWD sa mga opisyal sa barangay, nga mas nakahibalo sa ilang mga konstituwente ug makadasig sa ilang mga molupyo nga motabang sa pagbantay.
Ang mga barangay mahimong magpahigayon og mga tigom aron pahibaw-on ang mga residente sa nagkagrabeng problema ug sa mga pamaagi sa pagreport sa mga insidente.