Editoryal: Kaya ba sa mga Duterte nga magdungan og dagan?

Editoryal: Kaya ba sa mga Duterte nga magdungan og dagan?
EditoryalArt by John Montecillo

Daghan ang nakurat sa pagpahibawo ni Bise Presidente Sara Duterte nga managan ang iyang amahan nga si kanhi Presidente Rodrigo Duterte ug duha niya ka igsuong mga lalaki sa Senado sa 2025 midterm elections.

Kuyaw kay tulo gyud ka mga Duterte ang managan sa mao nga posisyon. Apan gipanghimakak kini sa amahan nga Duterte sa iyang pagduaw sa Tacloban City bag-ohay lang. Matod niya nga ingon sa nangomedya lang si Sara sa iyang gisulti.

Apan matod sa Bise Presidente nga gusto sa ilang inahan nga managan ang iyang mga igsuon sa Senado samtang siya mobalik sa pagka mayor sa Davao City.

Posible bang magdungan ang mga Duterte sa pagpanagan, upat kanila? Sayon ra ang pagsulti og dagan, apan sa konteksto sa politika sa Pilipinas, tungason kaayo ni tungod sa kadako sa pundo nga gikinahanglan. Di tiaw ang pagdagan og taas nga posisyon dinhi sa nasod.

Matod sa eksperto sa political campaign, bisan sa mayor sa dagkong mga dakbayan, ang P100 milyunes kaunon ra dayon. Mas luwas, ingon nila, ang P200 milyunes pataas.

Unsa na kaha kon sa Senado na ang bugno?

Wa pa nay labot sa ilang ihatag nga kontribusyon sa kaubanang mga senador sa partido, sama kanila ni Senador Bong Go ug Senador Ronald “Bato” dela Rosa. Wa pa sab nay labot sa lokal nga mga kandidato nga nakalinya nila.

Aron sila dad-on sa mga kandidato sa ubos, gikinahanglan nila ang pag-amot sa pundo alang sa kampanya. Kinsa man nga local candidate ang maghago sa pagdala kon wa kay giamot?

Mao bitaw na ang rason nga dunay popular nga mga kandidato nga wa nakadaug sa nangagi nga mga eleksyon tungod kay kuwang ang ilang makinarya kay kuwang og pundo. Wa nakaabot o dyutay ra ang nakaabot ngadto sa labing ubos nga istruktura sa political organization. Nya ra ba daghan ang mopili sa highest bidder sa eleksyon.

Naa tuoy mga political sponsor ang mga kandidato. Apan sa mga Duterte, naa pa ba silay lapad nga impluwensya karon nga di na presidente ang amahan?

Bisan ang kanhi presidente niangkon nga di na ingon niana kakusog ang iyang impluwensya itandi niadtong nidagan pa siya ug dihang nangatungdanan na. Gawas pa, matod niya nga tiguwang na siya busa di na siya makahunat sa pagpangampanya.

Tingali mahimo pa niyang mosuporta pinaagi sa pagtambong sa dagko nga mga rally alang sa iyang mga anak. Apan ang pagdungan og dagan nilang upat di makaayo nila tungod kay gasto kaayo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph