Ang trahedya nga nahitabo niadtong buntag, Biyernes, Hunyo 6, 2025, diin duha ka motorista ang namatay resulta sa bangga sa S. Osmeña Street, Barangay Tejero, Cebu City magsilbing leksiyon sa ubang mga motorista nga mao sab ang binuhatan.
Sa usa lang ka pamilok, duha ka kinabuhi ang naputol—si Alvin Dilao, 35 ug Bugsy Quilestino, 18. Kini usa ka timaan sa mas lawom nga problema sa disiplina, kakuwang sa kahibawo sa balaod sa trapiko, ug ang mga responsibilidad isip mga motorista ug komunidad.
Base sa CCTV footage nga gi-review sa Traffic Enforcement Unit, makita nga si Dilao ni-left turn paingon sa 13th Avenue, samtang si Quilestino nagpadulong sa SRP tunnel nga naghaguros sa pagpadagan. Ang bangga nga ilang nahiaguman dili lamang resulta sa teknikal nga sayop—kini usa ka kombinasyon sa ka walay hunahuna sa dangatan.
Sagad nga reaksiyon sa publiko ang pagtudlo kinsa sa duruha ang mabasol ug sad-an sa hitabo.
Asa man kita napakyas? Unsay mga sistema nga walay epekto? Kuwang pa ba ang seminar sa ahensiya sa transportasyon aron nga pahinumdoman sa trapiko, disiplina sa kalsada, ug mga hulga sa sobrang kaagresibo sa pagmaneho?
Ang teknolohiya, sama sa CCTV, epektibo sa pagpangita sa hinungdan—apan walay kapuslanan kini kon ang preventive measures dili ipatuman.
Husto ba ang atong training ug licensing system sa mga motorista? Ngano daghan gihapon ang nagpadagan og mga sakyanan nga wala klarong pagsabot sa safety rules? Asa ang preventive enforcement?
Kini nga insidente nagpukaw usab sa panginahanglan sa mas hugot nga implementasyon sa traffic education programs, speed limit enforcement, ug infrastructure improvement.
Sa panahon nga ang teknolohiya ug impormasyon anaa na sa atong mga kamot, ang kakulang sa disiplina ug konsensya.
Ang kinabuhi ni Alvin ug Bugsy dili na mabalik. Apan ang ilang kamatayon mahimo untang panaminan alang sa pagbag-o sa panan-aw sa tanang motorista—nga ang pagmaneho dili lang katungod, apan adunay dakong responsibilidad.
Panawagan sa mga ginikanan, sa mga kabatan-onan, sa mga traffic enforcer, ug policymakers. Ang seguridad sa kalsada dili buhat sa usa ka tawo lamang, kini usa ka paningkamot sa tibuok komunidad. Ayaw na paabuta nga may sunod pang kinabuhi nga mawala tungod lang sa pagdalidali.
Way kumo kon kita magmaampingon sa atong pagbiyahe o pagmaneho, hinay man o paspas mao rang abuta ngadto sa atong tagsatagsa ka mga destinasyon nga way hasol.
Ang disiplina sa dalan usa ka hulmahan sa atong kinaiya isip kabahin sa komunidad. Ang pagpili nga maghinayhinay, magbantay, ug magpakabana, usa ka gamay nga buhat nga adunay dako nga epekto sa kinatibuk-ang seguridad sa kalsada.