Mas maayong masubay, mailhan ug masilotan ang utok sa dungan nga pagtulis sa Macy's Jewelry Store ug DGC D' Gold Chain Jewelry Store sa Barangay Ermita, dakbayan sa Sugbo niadtong Agusto 8, 2024.
Sa pagkakaron, usa ka polis nga sakop sa National Capital Region (NCR) ug laing duha ang gipasakaan na og kasong robbery in band sa Miyerkules, Agusto 21, 2024, nunot sa maong insidente sa pagpanulis.
Dul-an sa P15 milyunes ang nakuha sa Macy's Jewelry Store ug DGC D' Gold Chain Jewelry Store nga, matod pa, sama sa kilat human wa moabot sa usa ka minuto ang ilang pag-ataki. Apan paspas usab ang imbestigasyon sa special investigation task group (SITG) sa kapulisan ug matag adlaw dunay positibong kalamboan sama sa pagpasaka na og kaso batok sa tulo.
Mao kini sila si Marcial Pacol Ponesto alyas “Jager,†31, taga Sector 6, Barangay Pagsabungan, dakbayan sa Mandaue; nagngalan og “Gab†nga taga Barangay Poblacion, dakbayan sa Lapu-Lapu; ug police non-commissioned officer nga nadestino sa Luzon nga kasamtangang nag-abang og balay sa Purok Rose, Sitio Kalit, Barangay San Antonio-Jubay, lungsod sa Liloan, Cebu, apan lumad nga taga Metro Manila.
Si Acting Cebu City Police Office (CCPO) Chief Antonietto Cañete niingon nga pasakaan usab nila og susamang kaso ang laing lima ka mga suspek kansang kalambigitan gi-validate pa pinaagi sa digital evidence sa Regional Anti-Cybercrime Unit (Racu).
Gikataho nga polis nga suspek maoy tag-iya sa Mitsubishi Adventure nga gisakyan human sa pagpanulis. Ang maong getaway vehicle narekober sa kapulisan sa alas 8 sa gabii sa Martes, Agusto 13, 2024, sa Zone Ahos, Barangay Paknaan, Mandaue.
Si Ponesto, drayber sa Mitsubishi Adventure nga silver grey nga adunay plakang GAB 5200, nisuway unta sa pag-ikyas apan nadakpan sa kapulisan ug nakuhaan og pusil, granada, ug mga jacket sulod sa sakyanan.
Base sa kalamboan sa imbestigasyon sa SITG, organisado ang grupo sa mga tulisan human ang lokal nga grupo dunay koneksiyon sa nakatag na nga gikaintapan nga robbery gang nga Kuratong Baleleng sa dakbayan sa Ozamiz.
Apan dili kaha ang utok sa pagpanulis kadtong polis nga taga NCR? Kon mapamatud-an kini, makaingon kita nga wala pa gyud mahingpit ang internal cleansing sa Philipine National Police (PNP).
Ug lisod na seguro ma-recover ang mga alahas apan ang utok o mga utok sa sindikato sa pagpanulis kinahanglan nga masikop ug masilotan aron masanta ang ilang dautang plano sa malinawong katilingban.
Mas dakong risgo sa komunidad kon ang utok sa pagpanulis o dautang elemento naa sa naglublob mismo sa ahensiya sa kagamhanan nga gitahasan sa pagpatuman sa kahusay ug kalinaw sa nasod.
Suportahan nato ang mga pagpaningkamot sa kapulisan o SITG sa pagsulbad sa laing krimen nga nahitabo sa naglambuong dakbayan.