Sa nagpadayong kasungian sa Metropolitan Cebu Water District (MCWD) mga konsumidor gipul-an ug nahasol sa way kasulbarang bikil sa maong water distributor tali sa Local Water Utilities Administration (LWUA).
Labing naapektuhan ang mga konsumidor nga nagkonsumisyon sa kakuwang sa water supply samtang ang uban, wa na gyuy agas ang gripo sa ilang mga panimalay.
Ang pangutana, kinsa may angayang mopatunga sa maong panag-away aron matapos na ang maong isyu.
Kinsa may magsilbing mediator aron mahilot ang panagbikil ug kasolusyonan ang giatubang nga suliran sa kanihit nga water supply nga way gidapigan.
Ilabi na nga nagmagahi ang MCWD board members sa pagtuman sila si Jose Daluz III, Miguelito Pato, Jodelyn May Seno ug ang general manager niini nga si Edgar Donoso, ngadto sa LWUA nga nimando sa pagsuspenso kanila.
Gani, ilang gikondenar ang gihimong lakang sa LWUA, interim board of directors, lakip na ang Cebu City Hall ug mibasol nga maoy hinungdan nga nabalda ang serbisyo sa MCWD human niadtong nahitabong pagbarikada ug pag-cordon sa MCWD Building sa miaging semana.
Ang maong suspension gihimo aron nga kahatagan og agianan ang himuong imbestigasyon sa pasangil nga grabeng alkansi sa MCWD ug ang kapakyas sa kadagkuan niini sa pagsubay sa procurement laws.
Bisan si Donoso wa mopatuo sa LWUA-installed interim board nga gimanduan sa pag-turn-over sa dokumento sa mga transaksiyon sa MCWD.
Ang MCWD nagserbisyo sa mga dakbayan sa Cebu, Mandaue, Lapu-Lapu ug Talisay. Lakip na ang mga lungsod sa Compostela, Liloan, Consolacion ug Cordova.