Ang Tourist Garden Hotel sa Barangay Agus, dakbayan sa Lapu-Lapu nasuta nga napalit na usa ka Chinese national nga lakip sa 169 nga nasikop sa pagronda sa Philippine offshore gaming operator (Pogo) niadtong Sabado, Agusto 31, 2024.
Apan kinsay local partner? Naa sa Batakang Balaod sa nasod nga gidili ang siyento porsiyento nga pagpanag-iya og negosyo sa usa ka langyaw. Busa sagad sa mga langyaw makigminyo og lokal aron way babag sa negosyo.
Bahin sa Pogo sa Lapu-Lapu, ang nakapasamot sa kontrobersiya mao ang mga hugonhugon nga hayan usa ka lokal nga negosyante o kaha politiko ang partner sa negosyo.
Matod pa, ang maong dapit abli sa publiko niadto apan dihang napalit na sa usa ka Chinese national ug giusab ang ngan nadto sa Tourist Garden Hotel, nahimo na kining eklusibo alang sa mga langyaw ug mga piniliang lokal nga bisita.
Apan niadtong Lunes, Septiyembre 2, 2024, ang Kagamhanan sa Dakbayan sa Lapu-Lapu niisyo na og cease and desist order batok sa hotel human ang dapit sa compound nga giokupahan sa Pogo nga nakarehistro nga usa ka KTV bar.
Samtang, ang 169 ka mga langyaw nga nasikop lakip sa nanag-iya sa hotel gidala sa kaulohan sakay sa usa ka abyon sa Philippine Air Foce (PAF) gikan sa Mactan Airbase sa Miyerkules, Septiyembre 3, 2024.
Sa pagkakaron, ubos na sila sa kostudiya sa Philippine Anti-Organized Crime Commission (PAOCC) ug nagpaabot sa ilang deportasyon ug pagtubag sa kalapasan sa balaod sa nasod.
Ang Pogo sa nasod gitugotan sa miaging administrasyon apan dihang nasuta nga gisakyan kini sa mga scammer nga nagbiktima sa mga Intsek sa mainland China, si Presidente Ferdinand Marcos Jr. nakahukom sa pag-ban niini subay sa awhag sa kagamhanan sa China.
Ang ronda sa Pogo sa Lapu-Lapu niadtong Sabado nakakurat sa mga lokal nga opisyal ug awtoridad.
Si Mayor Junard 'Ahong' Chan unang niluwat og pamahayag nga walay Pogo sa Lapu-Lapu. Bisan ang Police Regional Office (PRO) 7 nakaluwat og pamahayag nga walay Pogo sa Central Visayas.
May laing Pogo pa kaha sa Sugbo? Apan ang dakong tanghaga, kinsa kaha ang local partner-owner sa Tourist Garden Hotel?