Sa nahitabo nga suway nga pagbanhig ni Rolan ‘Kerwin’ Espinosa ang self-confessed drug lord ug karon nagpapili pagka mayor sa Albuera, Leyte dili lang maisip nga usa ka insidente sa kriminalidad, apan nakamugna og tumang kabalaka sa natad sa politika sa nasod nga hakog sa gahum, ug ang kasayon sa pagpatay.
Samtang, ang tinguha ni Espinosa nga mobalik sa politika gihulagway nga kontrobersiyal kinsa usa sa mga nalakip kaniadto sa listahan sa administrasyon ni Presidente Rodrigo Duterte sa iyang war on drugs.
Unsaon nato pagdawat nga ang usa ka tawo nga miangkon nga nalambigit sa illegal drugs, karon magpapii karong eleksiyon?
Niadtong hapon sa Huwebes, Abril 10, 2025, gisuwayan sa pagpatay si Espinosa atol sa iyang pagpangampaniya atubangan sa publiko diin ang gunman nagtago sa kisame sa stage ug napagan ang usa ka bata ug ang igsuon ni Kerwin nga si Mariel Espinosa Marinay—kandidato sa pagka bise.
Kini nagpamatuod nga ang political violence buhi ug aktibo pa gihapon atol sa eleksiyon.
Ang maong hitabo nagpahinumdom sa kaso sa iyang amahan, si Rolando Espinosa Sr., kinsa gipatay sulod sa selda niadtong 2016 sa usa ka operasyon nga giingong ‘nisukol.’ Ang pagkamatay sa iyang amahan ug karon ang pagpamusil kaniya nagpaila nga adunay mas lawom nga mga pwersa nga nagalihok sa ilang palibot—mga pwersang posible nga nagapadagan sa politika, krimen, ug tinguha nga pagpahilom sa mga nahibaw-an nga kamatuoran.
Angay ipangutana: Kinsa ang makapahimulos sa kamatayon ni Kerwin Espinosa? Kontra ba niya sa politika? Kauban ba sa kanhi drug network nga nahadlok nga adunay ibutyag?
Kini dili lang mga ispekulasyon—apan mga pangutana nga angayan hatagan og tin-aw, patas, ug independente nga imbestigasyon.
Kini nga insidente usa sab ka pahimangno nga ang proseso sa eleksyon sa ubang bahin sa nasod nameligro, diin ang bala maoy tubag sa balota. Kon ang pagdagan sa eleksiyon nagpasabot og kahadlok, pagpamusil, ug pagmugna og kasamok diin gihinay hinay og patay ang demokrasya.
Si Espinosa ang gikataho nga luwas na sa makuyaw nga kahimtang ug nagpaalim sa tambalanan sa iyang samad pinusilan nga nahiaguman.