Sa maisugon ug init nga pamahayag nga gilutawatan ni Davao City Mayor Sebastian ‘Baste’ Duterte nagpakita ang nagkagrabe nga pagkabahinbahin sa politika sa nasod.
Sa pakigpulong ni Mayor Baste atol sa kasaulogan sa ika-88th nga “Araw ng Dabaw” niadtong Dominggo, Marso 16, 2025, nahimong sumsoman si Presidente Ferdinand Marcos Jr., ilabi na sa pamahayag: “Mr. President Marcos, you will never be loved, especially (by those) who are calling out for Rody Duterte’s name. You will never be loved. We will stand up and we will fight back!”
Nagpakita nga adunay mga niunong sa gidagangatan ni kanhi Presidente Rodrigo Duterte ilabi na sa mga supporter nga dili lang sa Mindanao.
Basi sa pagbanabana nga moabot sa 20,000 ngadto na sa 30,000 nga mga supporter ang nagtapok atol sa maong kalihukan sa Davao City.
Ang nagpadayon nga tensiyon tali sa mga Duterte ug Marcos nagkamugna og pagkabahinbahin sa pagsalig sa katawhan sa nasod.
Bisan pa sa personal ug politikal nga panagbangi, mas dakong hagit alang sa mga Sugboanon ug Mindanaonon ang episyente nga pagpangagamhanan.
Ang mga isyu sama sa kalig-on sa ekonomiya, kasiguruhan sa katawhan, ug ang giyera batok sa ilegal nga druga maoy padayon nga prayoridad sa pangadlaw-adlaw nga kinabuhi.
Dili ang panagbingkil sa mga politiko ang angay tagdon, apan gikinahanglan nga mahatagan sab og pagtagad ang ilang kapasidad sa paghatag og solusyon alang sa kinabag-an.
Sa mosunod nga mga tuig, ang hagit alang sa lokal ug nasyonal nga mga lider mao ang paglapas sa utlanan sa politika aron unahon ang panginahanglan sa katawhan. Ang tinuod nga liderato dili sukdanan ang pagka-popular, kondi sa ilang actual nga buhat nga makahatag ug kaayohan sa tanang Pilipino.
Sa karong panghitabo ang tinuod nga pangutana, dili kon si kinsa ang gihigugma pag-ayo sa katawhan. Apan si kinsa kadtong lider nga nakahimo og dakong kausaban alang sa kalambuan sa nasod.