Sa panghitabo nga niresulta sa kamatayon sa 23 anyos nga call center agent nga naligsan sa naghaguros nga firetruck samtang nagmaneho sa iyang motorsiklo, adunay daghang angayng susihon ug ipasabot.
Ang maong trahedya nahitabo sa intersection sa A.C. Cortes St. ug Plaridel St. sa Brgy. Cambaro, Mandaue City, niadtong gabii sa Dominggo, Marso 23, 2025. Ang maong firetruck niresponde sa nahitabong sunog sa Barangay Paknaan, Siyudad sa Mandaue.
Una, ang padayon nga imbestigasyon sa kapulisan maoy angayang suportahan. Ang pagkolekta sa CCTV footage ug pagpangita sa mga testigo makatabang aron masuta ang tinuod nga nahitabo.
Importante nga matino kon adunay pagkuwang sa drayber sa firetruck, sa biktima, o sa mga sistema sa trapiko sa maong dapit.
Ikaduha, kini nga insidente nagpahinumdom sa tanan nga mga motorista sa panginahanglan sa pagpabiling mabinantayon sa karsada. Bisan pa kon anaa na sa ‘GO’ signal, kinahanglan magpabiling alerto ilabi na kon adunay mga emergency vehicles.
Base sa balaod sa trapiko sa higayon nga atong madungog ang emergency vehicles sama sa police/patrol cars, firetruck, ambulance ug uban pa, gikinahanglan nga ang tanang motorista mohatag og agianan o right-of-way aron sila makaagi.
Mohunong sa tuo nga bahin sa dalan hangtod nga makaagi ang emergency vehicles, bisan og green light sa trapiko mohunong gihapon aron nga makalusot sila sa intersection.
Keep distance sab sa mga emergency vehicles nga adunay siren ug flashing light kay kalapasan sa balaod sa trapiko kon mosikit o mopaduol ang usa ka motorista.
Sa katapusan, kinahanglan nga hatagan ug hustisya ang pamilya sa biktima. Ang ilang desisyon kon mopasaka ba og kaso batok sa mga responsable kinahanglan tahuron.
Apan labaw sa tanan, ang maong trahedya angayan nga panaminan o makuhaan og pagtulun-an alang sa tanang mga motorista ug mga awtoridad.
Ang kaluwasan sa atong mga kadalanan usa ka kolektibong responsibilidad.
Mag-amping kita kanunay ug magpakita og konsiderasyon sa uban. Sa ingon, mapanalipdan nato ang kinabuhi sa matag usa ug malikayan ang susamang mga trahedya sa umaabot.