Daghan ang negatibo og reaksyon sa post sa usa ka bride sa Amlan, Negros Oriental sa ilang kasal sa miaging semana, diin ang magtiayon nagdali na og paso tungod kay usa ka oras sila nga late. Inay alas 8 ang kasal, niabot sila sa alas 9:30 sa buntag.
Gisugdan na sa pari ang seremonyas samtang nagpaso pa ang magtiayon padulong sa altar nga nagdali-dali intawon. Nakugang sab sila dihang gipahibawo nga late sila kay gipahibawo diay sila sa usa ka ninang nga giirog ang kasal, gikan sa alas 8 ngadto na sa alas 9:30.
Sa ato pa, wa silay sala kay di man sila ang niusab sa schedule usa ka adlaw sa wa pa ang kasal.
Kini nga problema nagagumikan sa nagkatuali nga komunikasyon nga nidaku og maayo tungod sa post sa bride. Apan di sab mabasol ang bride kon nipahungaw siya pinaagi sa social media post niya. Di baya lalim ang iyang naagian.
Dunay mga netizen nga niingon nga gisusi unta kon nganong naingon niadto ang pari. Kay diay dunay nagsunod nga misa sa patay.
Apan isip pari, di unta ingon niadto ang iyang gihimo tungod kay ang kasal, di yano nga sakramento kay kini balaan kaayo. Sa iyang gihimo, iyang gipakita nga ordinaryo ra diay ang kasal, mahimo lang nga lamu-lamuon ang paghimo. Maisip na hinuon nga sama og ordinaryo nga seremonyas ang kasal.
Di lalim nga ang kahimtang sa bride nga mabdos ingon sa giyaga-yagaan sa pari. Komedya ra kuno to. Di na maayo nga komedya. Pun-an pa nagmisa na samtang nagpaso ang entourage. Unya pakapinan pa og sulti kabahin sa iyang pagmabdos.
Nangutana unta ang taga simbahan sab kon nganong nadugay ang magtiayon. Unta, na-adjust ang gitakda nga misa sa patay. O giirog una og gamay ang seremonyas, inay gipaabot pa ang bride ug groom.
Karon kay kaslon sila og balik kay dunay nitanyag nga mo-sponsor sa wedding. Kon nahuman na ang paghatag sa sakramento, wa na kinahanglana ang laing kasal. Ang seremonyas sa kasal di baya sama sa usa ka duwa sa entablado nga dunay second act. Kon nahigot na silang duha bisan sa problema atol sa seremonyas, di na angay pang usbon.
Angay usab sabton nga ang pari tawo lang. Natural nga madala usahay sa kasuko o kaha nagkomedya nga wa magtan-aw nga makapasakit siya sa iyang gitumong.
Apan leksyon na kadto sa pari nga hingtungdan nga isip alagad sa Diyos, gitan-aw siya nga labaw morally sa mga parokyano. Sa mga sitwasyon nga ingon niadto, gikinahanglan ang tumang pailob. Timan-an usab nga ang misa ug sakramento balaan, di mahimong dali-dalion lang.