Editoryal: Koordinasyon ug panagtambayayong batok krimen

Editoryal: Nagwang-wang?
EDITORYAL

Sa ikaduha nga higayon, nahitabo na sab ang rambol tali sa duha ka mga grupo sa mga batan-on, uban kanila mga menor de edad sa lungsod sa Liloan. Maayo na lang kay way namatay, igo rang nangaangol ang tulo ka mga biktima nga gitabangan sa labing minos 10 ka mga batan-on.

Niadtong unang hitabo namatay ang usa ka dalaga nga menor human maoy napagan dihang gipusil ang iyang uyab sa karibal nga gang. Sa duha ka mga insidente, dali ra nga nangasikop ang mga suspek.

Apan mahimo ra baya ni mapugngan unta kon naglihok pa ang mga otoridad gikan sa sayo nga gabii hangtod sa sayo sa buntag nga maoy sagad nga mga oras nga kini nahitabo. Matod sa Cebu Police Provincial Office (CPPO) nga dako kaayo unta og gikatabang ang mga barangay tanod sa pagsanta nga di mahitabo kining mga rambol o kagubot sa mga barangay.

Tinuod kaayo ni nga sulti sa mga polis tungod kay mas nasayod ang mga tanod sa mga dapit nga tapukanan panahon sa kagabhion hangtod na sa kaadlawon. Sila ang mas nakaila kinsa ang mga menor de edad ug mga tag-iya sa mga establisemento. Nakaila sab sila kinsa ang mga sakop sa mga gang nga naglihok sa mga barangay, sama sa notadong Blood ug Crips nga managkaribal.

Kini nga problema sa Liloan komon ni nga problema sa mga lokalidad, partikular na sa mga barangay. Responsibilidad kini sa mga barangay kapitan ug sila ang mas dunay tulubagon kon dunay mga krimen nga nahitabo sa ilang tagsa ka jurisdiction nga matawag nga gamay nilang gingharian.

Kon molihok lang ang mga barangay kapitan sa tiunay ug tinud-anay nga pagpatuman og mga programa alang sa kahapsay ug kalinaw sa iyang lugar, segurado nga motidlom og maayo ang mga krimen kay ang mga tanod force multiplier taliwa sa kadako sa kakuwang sa kapulisan nga nadestino sa tagsa ka lokalidad.

Di maato sa kapulisan ang pag-roving sa tanang mga dapit sa kagabhion kay pipila lang sila. Apan wa sab ni magpasabot nga itugyan na lang sab ngadto sa mga barangay ang pagpatunhay sa kahapsay ug kalinaw. Koordinasyon ang gikinahanglan kaayo tali sa kapulisan ug mga barangay.

Matumbok man ang mga dapit diin sagad mahitabo ang mga krimen, sama sa mga tulis, pagpayuhot og illegal drugs ug mga rambol diin magtapok ang mga grupo sa mga batan-on. Mao ning dapita ang hatagan og prayoridad, wa kinahanglana nga lukpon ang tibuok dapit sa mga polis ug tanod pag-roving.

Koordinasyon ug panagtambayayong ang yawe ning tanan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph