Paspas ang imbestigasyon sa kapulisan sukad sa dungan nga pagtulis sa duha ka pawnshop ug jewelry stores sa dalan Calderon, Barangay Ermita, dakbayan sa Sugbo niadtong Huwebes, Agusto 8, 2024.
Kulbahinam ang matag adlaw nga kalamboan sa pagsubay ug pag-ila sa mga tulisan gikan sa unang pagkakaplag sa usa sa mga motorsiklo nga gigamit sa pagpanulis ug sports utility vehicle (SUV) nga getaway car lakip sa pagsikop sa drayber niini.
Tungod sa positibo nga dagan sa imbestigasyon, hayan maila ug masakpan sa dili madugay ang utok sa tulis. Mataral sa hukmanan ang mga malapason aron mapahamtangan og tukmang silot sa balaod.
Ang kalambigitan sa nahabilin sa Parojinog robbery group sa Dakbayan sa Ozamiz ug uban sa lokal nga kakunsabo gisubay sa Special Investigation Task Group (SITG), nga gilangkoban sa nagkalainlaing units sa awtoridad sa pagpanguna sa Cebu City POlice Office (CCPO).
Matod ni Police Major Maria Theresa Macatangay, deputy city director for operation sa CCPO ug spokesperson sa SITG, ang SUV maoy gigamit sa pag-ikyas sa mga tulisan.
Gi-park kini dili halayo sa jewelry stores nga nakita sa CCTV footages sa dapit.
Ang nakuha sa CCTV maoy gisunod sa pakisusi sa kapulisan kung asa niagi ug hantod sa katapusan nga nasigpatan sa Barangay Looc, dakbayan sa Mandaue, alas 3:44 sa hapon sa Huwebes, Agusto 8, 2024.
Usa sa tulo ka motorsiklo nga gigamit maoy una nang na-recover sa Carbon Police Station nga gi-park dalan Burgos lakip sa nakuha ang puwa nga helmet nga mitakdo sa CCTV video footage sa Macey’s Jewelry Gold and Silver.
Nailhan na sab sa kapulisan ang katapusan nga nakapalit sa maong motorsiklo gikan sa usa ka tindahan ug nasuta nga lima na kini ka higayon nga nabaligya.
Nagtuo ang SITG nga naa pa sa Sugbo ang mga tulisan ug mapasakaan kini og kaso ning semanaha kon mahuman ang tanang dokumento sa ilang imbestigasyon.
Unsa kahay kalamboan ning adlawa? Kulbahinam. Atong nuntan. Congratulations daan sa SITG sa paspas nga kalaboan sa inyong imbestigasyon.