Sama sa mosumbalik sa technical team sa Palarong Pambansa sa Department of Education (DepEd) ang ilang alegasyon bahin sa kakuwang sa gitas-on sa track oval sa Cebu City Sports Center (CCSC).
Tungod sa maong kuwestiyon, ang samang komitiba nagdumili una sa pag-ila sa bag-ong record nga nakuha sa mga atleta sa track and field.
Ning bahina, ang mga atleta naapiki nga naningkamot nga molambo ang ilang personal nga record. Enosente sa isyo sa track oval.
Ug kinsay responsable sa pagseguro sa sakto nga sukod sa track oval?
Sila si Narciso Dasigan ug Jeanette Obiena mao ang gikutlo sa taho ug ningkompirmar sa kwestiyon nga kuwang og 20-metro sa 400-meter nga sukod.
Gibasol sa komitiba mao ang kontraktor sa rubberized track oval nga wala masunod ang tukma nga sukod.
Apan ang SBD Builders nangatarungan usab nga wa silay giusab ug igo lang sa pag-rubberized sa track oval.
Tinuod, ang oval sa CCSC karaan na. Dili seguro pwede nga pagmub-an o patas-an pa sa kontraktor.
Ug ang kontraktor nipasa og balik sa isyo ngadto sa DepEd kon nganong nitugot sa paggamit sa track sa Palarong Pambansa kon dunay kwestiyon.
Si DepEd Cebu City Asst. Supt. Adolf Aguilar niingon nga ang pagsusi sa sukod sa rubberized track oval sa CCSC ubos sa technical committee sa Palaro.
Apan dili ba nga maong komitiba mismo mao ang gikutlo sa taho nga nagkwestiyon sa kakuwang sa sukod sa track oval sa CCSC? Kon mao, misumbalik usab kanila ang isyo?
Hinuon, atol ning pagsuwat, wala matino ang kamatuoran sa maong alegasyon human wala pay opisyal nga pagsukod o balik sa track oval.
Ang technical committee dili magpaabot sa sukod nga ipresentar sa kontraktor. Maayong mopasiugda og imbestigasyon. Sukdon kini ug saksihan sa stakeholders?
Paet lang, ang mga atleta sa lumba sa dagan. Ang motala og bag-ong record dili pa opisyal nga ilhon?