Editoryal: Lain na sang black propaganda?

EDITORYAL
EDITORYAL

Ang kanhi agent sa Philippine Drug Enforcement Agency (PDEA) nga si Jonathan Morales niinsister nga ang nikatap nga dokumento nga naglambigit kang Presi­dente Ferdinand Marcos Jr. sa illegal drugs tinuod.

Sa hearing sa Senate committee on public order and dangerous drugs inquiry, siya niingon nga si Marcos maoy target unta sa usa ka anti-drug operation niadtong 2012.

Ang dokumento kalabot niini lehitimo, matod niya. Niingon siya nga siya ang naka-interview sa usa ka informant kalabot ning mao nga impormasyon.

Apan ang pangu sa PDEA Director Gene­ral Moro Virgilio Lazo niingon nga way dokumento kalabot ning gihisgutan ni Morales. Iya usab nga giguba ang repu­tasyon ni Morales kay diay, kini gitaktak nga agent sa PDEA human nila mahibaw-i nga namakak kini. Ilang nasayran nga si Morales gitaktak sa pagkapolis.

Ang impormasyon 2012 pa, apan nganong karon pa man kini gihisgutan? Nahitabo kini sa panahon pa sa pamunoan ni anhing Presidente Benigno “Noynoy” Aquino III, kaaway sa mga Marcos.

Kay kuno gipugngan sa usa ka Mala­ca­ñang official mao nga wa nadayon ang operation. Dako kaayo ni nga isyo nga makaguba unta sa mga Marcos, labina sa Presidente karon. Busa lisod tuohan nga kini di sakyan sa kanhi mga opisyal sa administrasyong Aquino, nga kaalyado ni kanhi Bise Presidente Lenie Robredo.

Nitumaw sab kini nga isyo human si kanhi Presidente Rodrigo Duterte naghisgot o nibuhi ning mao nga isyo nga iya nang gihisgutan kaniadtong nag-angat pa ang eleksyon.

Sa kadaghan na sa nangagi nga mga hearing sa Senado ug Ubos Balay Balauranan nga dunay mga pamahayag sa kunohay mga saksi apan gimao-mao diay sa miaging mga administrasyon, apil na kang Duterte, kining labing uwahi nga kalambuan batok kang Marcos hayan gama-gama na sab sa maayo kaayo mangdispuga nga mga propagandista.

Sa pagkapupos sa termino ni Duterte, daghang mga saksi kaniadto batok kang kanhi senador Leila de Lima nga namakwi sa ilang mga pamahayag kay diay, minamao-mao diay kadto.

Tungod niini, anam-anam nga gipang-dismiss ang mga sumbong batok kang De Lima. Nitumaw nga gipugos lang diay sila kaniadto aron mokanta sa tuno nga gusto sa kanhi administrasyon. Busa, unsa man say garantiya nga di kini black propaganda aron pagguba sa imahe sa administrasyong Marcos? Di ba? Makapaduha-duha na gani kon unsay tinuod, unsay di.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph