Taliwala sa mga isyo nga nagtumaw, mabulukon ug puno sa daghang leksiyon ang pagtapos sa Martes, Hulyo 16, 2024, sa Palarong Pambansa 2024 nga gipahigayon sa Dakbayan sa Sugbo. Takos sa pag-congratulate ang tanang stakeholders sama sa Kagamhanan sa Dakbayan sa Sugbo ug Department of Education (DepEd).
Bisan nasayod kita nga dunay nagbitay nga kwestiyon sa pagtapos sa Palaro bahin sa saktong sukod sa gitas-on sa track oval sa Cebu City Sports Center (CCSC). Kinsay responsable sa maong bulilyaso? Gibasol sa technical committee sa DepEd sa Palaro ang SBD Builders nga kontraktor sa rubberized track oval apan nanghunaw usab ang naulahi.
Ug sumala pa, ang technical committee nasayod na sa kakuwang sa sukod sa track oval pipila ka adlaw sa wala pa magsugod ang 2024 Palarong Pambansa. Nganong gipadayon ang lumba sa track oval? Tungod niini, ang mga atleta nga naka-break sa record sa taas nga dagan wa giila sa DepEd. Inosente ug luoy ang mga atleta.
Sa sumada, nahitabo na kini bisan duna pay masilutan. Apan ang maong bulilyaso nagbilin og dakong lama sa kasaysayan sa paugnat-sa-kusog sa nasod.
Maayong makuhaan kini og leksiyon. Masubay kining tanan sa kaapiki sa pagpangadam o renobasyon sa CCSC, labi na sa pagpuli sa rubberized track oval nga nahuman pipila na lang ka adlaw sa pag-abli sa Palaro. Wa nay igong panahon sa pag-usab kon dunay bikil. Mao seguro nga gihilom lang unta kini sa technical team. Apan way aso nga makumkom, nabutyag kini sa media.
Samtang, ang angay tubagon sa SBD Builders, nganong gisira ang CCSC sud sa usa ka tuig apan apiki na ang pagsugod sa renobasyon? Gawas niini nga isyo, malampuson ang ubang aspeto sa pag-host sa Palaro labi na sa seguridad sa kapulisan ug suporta sa mga yanong Sugbuanon sa pag-abi-abi sa mga bisita.