Editoryal: Leksyon sa mga politiko

EDITORYAL
EDITORYAL

Nakugang si Mayor Michael Rama human niya nasayran gikan sa usa ka reporter sa SunStar Cebu nga siya gisuspenso sa Ombudsman tungod sa sumbong sa upat ka mga kawani sa City Hall nga wala masuweldohi sa pipila ka mga buwan sa ilang trabaho.

Ang upat gipangbalhin og mga buhatan nga matod nila, ilang gituman kay maoy mando sa administrasyon kanila bisan sila nipasaka og reklamo. Apan gipanghimakak kini ni Atty. Collin Rosell, city administrator, kay giingon niyang wala sila nang-report mao nga nalangay ang pagproseso sa ilang suweldo.

Ang preventive suspension wa nagpasabot nga sad-an na ang mayor ug laing pito ka mga opisyal, lakip na kang Rosell. Ang tumong niini mao nga mapugngan ang impluwensya sa dagan sa imbestigasyon sa reklamo batok kanila ni Rama kay sila mga opisyal man. Karon nga gisuspenso, wa na silay gahom kay di na man sila makabuhat sa ilang official functions.

Kining nahitabo sa upat ka mga kawani naandan o makadaghan na kini mahitabo sa Cebu City Hall. Di sab kay sa Cebu City lang kini nahitabo, naandan na kini nga buhat sa mga politiko nga mopuli sa pagpangatungdanan. Sa ilang pag-ilis og mga tawo, maratsada ang mga kawani nga dunay permanente nga mga posisyon.

Hayan mao ni ang nahitabo sa upat ka mga kawani.

Kanus-a man mahunong kining buhata sa mga politiko nga kon di ilang mga tawo ug ilang matan-aw nga di nila ikasinabot, ila dayon nga ilabay sa laing opisina? Kining gibuhat sa upat nga pagsukol ug pagpanalipod sa ilang mga katungod, maayo nga ehemplo ug mahimong sukaranan ug basehanan sa ubang mga kawani nga mahiagum sa samang kapalaran.

Panahon na nga undangon sa mga public official ang sayon ra kaayo nga pagtangtang og kawani ug opisyal nga duna nay permanenteng posisyon tungod lang kay di nila tawo. Unta, job performance ang basehan, di ang pulitikanhong linya. Kay ang public service, di private enterprise, nga mabuhat na sa mga lider ang tanan niyang gusto, nga sama sa usa ka tag-iya og negusyo.

Dunay mga balaod nga gitamdan ang pagpangalagad sa kagamhanan nga sumbanan ni bisan kinsa nga naa sa gobyerno. Di kini mayama-yamaan ni bisan kinsa, bisan sa labing gamhanan nga local chief executive. Karon nga naa na ni nga reklamo, daghan ang nangalipay niini nga yano nga mga kawani, labina kon molampos sila sa pagpatubag sa hingtungdan nga mga opisyal.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph