Ang nahitabong pagpamusil sud sa usa ka resto bar sa Lungsod sa Argao, nga misangpot sa kamatayon ni Elmer Angelo Amarillo ug ang pagkasikop sa Presidente sa Sangguniang Kabataan (SK) Federation sa maong lungsod, usa ka trahedya nga dili lang personal apan mahulagway nga usa ka pampublikong kapakyasan.
Ang Sangguniang Kabataan, maisip nga pundok sa umaabot nga liderato sa nasod, angayan nga magsilbli nga ehemplo sa maayong pamatasan nga mag-andam kanila sa mas taas nga posisyon sa gobiyerno sa umaabot.
Apan, ang pagkalambigit sa krimen nagbukas sa dakong pangutana: Asa na ang atong giila nga integridad ug disiplina sa lideratong kabatan-onan?
Walay lugar sa katilingban, labi na sa serbisyo publiko, ang personal nga kasuko nga misangpot sa pagkutlo sa usa ka kinabuhi. Ang pagbaton og armas ug ang paggamit niini sa publikong lugar, nagpakita sa kawalay pagpakabana sa moral ug legal nga obligasyon sa usa ka lider. Ang maong panghitabo usa ka timaan nga adunay seryusong kakulian sa pag-ila sa limitasyon sa gahum ug responsibilidad sa posisyon.
Ang kapulisan mitumbok sa motibo nga selos o love triangle. Bisan pa man nga kini personal nga aspeto, dili kini angay mahimong rason sa paggamit sa bayolente nga paagi. Labaw pa, ang pagpamatuod nga adunay lisensya ang suspek sa armas apan walay permit to carry nagsilbing hulga sa kasigurohan sa publiko kung kini mapaluyohan sa implementasyon sa balaod.
Samtang ang proseso sa imbestigasyon magpadayon ug ang hustisya maghukom, ang panghitabo nagpahinumdom kanato sa dako nga panginahanglan sa reporma sa atong SK system. Dili lamang kini isyu sa indibidwal nga kapakyasan, apan ang kakuwangan sa pagpanday ug pagbansay sa mga batan-ong lider. Asa man ang ethical training? Asa ang mentorship gikan sa mas nakaantigo nga lider sa barangay ug lokal nga konseho?
Ang lokal nga mga pamunuan, ang DILG, ug ang mga eskwelahan kinahanglan nga magtinabangay sa pagtukod og usa ka programa nga lig-on sa pamatasan, kahibalo sa balaod, ug kahulugan sa tinuod nga serbisyo publiko alang sa tanang SK official.
Ang lideratong kabatan-onan dili angay mahimong plataporma lamang sa ambisyon, kon dili usa ka training ground sa tinuoray nga pagka-lider—ubos sa tarong, saktong, ug malinawon nga pamatasan.
Kinahanglan nga moabot ang usa ka higayon sa atong katilingban nga ang posisyon sa SK dili lang tan-awon nga simbolo sa gahum apan adunay panglantaw sa mas maayong ugma alang sa kabatan-onan ug sa nasod. Apan samtang magpabilin nga walay tukmang pagpangandam ug pagsabot sa papel sa usa ka lider, magpadayon ang risgo sa gahum.
Kini nga kasinatian, makapaguol, ug magpabiling leksyon nga magtudlo kanato sa kahimtang sa lideratong kabatan-onan karon—ug sa atong obligasyon nga kini usbon.