Manghinaut ko nga ang pagpirma sa Department of Education (DepEd) sa Implementing Rules and Regulations (IRR) alang sa Anti-Bullying Act of 2013 makapawagtang o ba kaha makapaminos sa insidente sa bullying sa eskwelahan.
Bisan tuod og dugay na kini nga balaod, apan kining mga bag-o ug mas tin-aw nga mga lagda maghatag og “mas hait nga ngipon” nga gikinahanglan aron kini mahimong epektibo.
Sama sa gipunting ni Education Secretary Sonny Angara, “Ang eskuwela ay lugar ng pagkatuto, hindi ng pang-aapi. Wala dapat puwang ang bullying sa kahit anong sulok ng ating mga paaralan at lipunan.”
Gimando sa bag-o nga lagda nga ang tanang publiko ug pribadong eskwelahan lakip na ang mga anaa sa gawas sa nasod, mosagop ug mo-implementar sa usa ka standard nga anti-bullying policy.
Kining maong standard nga anti-bullying policy nagpasabot nga wala na’y kalibog o luna alang sa mga eskwelahan nga pasagdan ang ilang katungdanan.
Naghimo sab kini og tin-aw nga sistema alang sa pag-atiman sa mga reklamo sa bullying.
Ang labi nga makapadasig bahin niining bag-ong polisiya mao ang iyang proactive ug komprehensibo nga pamaagi.
Dili lang kini bahin sa pag-react sa pisikal nga kabangis human kini mahitabo.
Giila sab sa IRR ang makadaot nga mga porma sa bullying sama sa emosyonal nga kagul-anan ug sosyal nga pagbiya nga kasagaran dili mareport.
Pinaagi sa pagpasabot niining mga “precursor behaviors,” ang bag-ong mga lagda naghatag og gahom sa mga magtutudlo ug staff sa pagpangilabot sa dili pa mograbe ang sitwasyon.
Ang Learner Formation Officer maoy gitudlo nga first responder alang sa mga reklamo.
Kini nagsiguro nga ang matag report seryosuhon ug atimanon dayon nga mapugngan ang mga insidente nga dili ibalewala o pasagdan.
Sakto sab nga giila sa polisiya nga ang pagsulbad sa bullying usa ka hiniusang responsibilidad.
Kini nga hiniusang paningkamot mahinungdanon tungod kay sama sa giingon ni Angara, “Walang bata ang uunlad kung araw-araw siyang takot pumasok sa klase. Kaya itong polisiya ay hindi lang para sa disiplina, kundi para rin sa kalidad ng edukasyon.”
Ang bullying usa ka dakong babag sa akademikong kalampusan sa usa ka bata.
Nagresulta kini sa absenteeism, dili maayong performance, ug bisan sa pag-undang og eskwela.
Pinaagi sa pagsulbad sa ugat sa niining kahadlok, dili lang giprotektahan sa DepEd ang mga estudyante kondili direkta sab nga gipauswag ang kalidad sa edukasyon.
Sa katapusan, kining mga bag-ong regulasyon usa ka gamhanan nga lakang padulong sa paghimo sa atong mga eskwelahan nga tinuod nga luwas nga palibot.
Naghatag kini og tin-aw nga framework, gihimo ang tanan nga manubag, ug labaw sa tanan, nagpadala og lig-on nga mensahe ngadto sa mga estudyante ug mga magtutudlo nga ang bullying dili tugotan.
Usa kini ka kadaugan alang sa matag estudyante nga gusto’ng makakat-on nga dili bation og kahadlok.