Usahay, dunay mga panghitabo nga dili nato masabtan.
Apan unsay nagtukmod sa usa ka tawo sa paghimo sa linuog nga krimen?
Makurat na lang kita sa pagkasayod sa makaluluoy nga taho, sama sa kamatayon ni Charina Relativo, dalaga apan dunay kapuyo, ug saleslady sa usa ka mall.
Gipatay siya sud sa giabangang lawak sa boarding house sa Sitio Laguna, Brgy. Bulacao, Dakbayan sa Sugbo niadtong Biyernes sa buntag, Agusto 2, 2024.
Ang nag-unang suspek sa krimen nga si Darren Somosot Cui, 25, silingan usab sa biktima, nadakpan human maalarma nga armado sa Brgy. Sambag 2, Dakbayan sa Sugbo.
Sa ulahing kalamboan, ang Cebu City Police Office (CCPO) nipresentar ni Cui atol sa press conference sa Lunes, Agusto 5, 2024.
Mas makasuprisa ang pag-angkon ni Cui sa krimen ug pag-asoy sa detalye sa pagpatay niya sa biktima nga matawag nga linuog.
Nisulod siya sa lawak sa babaye ug gusto siya makighilawas apan pagdumili ug iyang nahinaykan sa pagtuok ug namatay.
Bisan unsay rason nga naglimin sa estorya sa duha, ang pagkutlo og kinabuhi dakong kalapasan sa balaod sa tawo ug mata sa Magbubuhat.
Unsay posible nga nag-aghat ni Cui: tumang kaibog o ubos kaha sa espirito ka ilimnong makahubog o gidiling drugas? Sakit sa pangutok? O kombinasyon kaha niini?
Sa pag-angkon sa suspek sa salaod nagtimaan sa pagtuyok sa hustisya sa kamatayon sa biktima.
Ang korte na lang ang motimbang, mohusay, motimbang ug pinal nga mohukom sa kaso.
Kita nga nagsubay sa nag-viral sa social media sa dautang hitabo mokutlo og pagtulun-an aron malikay o dili usab makahimo sa samang salaod.
Busa, ang pagpuyo sa yano nga kinabuhi ug pagkamaampuon, yawe sa malinawon, malipayon ug malampuson nga pagpuyo.