Magdasok na pud ang mga bus terminal, pier ug airport sa mga pasahero nga mamauli sa tagsatagsa nila ka probinsiya aron mobotar sa umaabot nga nasyonal og lokal eleksyon karon’g Lunes, Mayo 12, 2025.
Kini human gideklarar ni Presidente Ferdinand Marcos Jr. nga special non-working holiday ang Lunes nga tungod niini mahimo na kini nga long weekend.
Ang mga empleyado sa gobiyerno magsugod na og pamauli sa Sabado sa buntag, Mayo 10, sanglit kutob ra man sa Biyernes ang ilang trabaho, samtang kadtong mga trabahante sa pribadong kompanya sa Sabado sa gabii igkahuman sa ilang trabaho.
Makauban na usab nila ang ilang pamilya nga tua sa pro-binsiya.
Samtang ang ekonomiya sa kalungsoran molambo na usab sanglit ang mga tawo manuroy uban sa ilang pamilya, mangaon sa gawas, mag-picnic mangaligo og dagat, mamalit sa merkado publiko og pagkaon nga ilang pagasalohan ug ang uban mangadto sa mall kon ang ilang lungsod anaa niini.
Gilauman usab nga daghan’g mga inahan nga isuroy sa ilang mga anak ug kapikas sa kinabuhi karon’g umaabot Dominggo, usa ka adlaw sa dili pa ang eleksyon, sanglit Mother’s Day man kini, ang adlaw nga gipahinungod alang kanila.
Lakip sa mga pamaagi sa pagtratar sa mga mama sa mismong Mother's Day mao ang paghatag kaniya og card o regalo ug pagtawag sa telepono aron siya i-greet, pagdala kaniya og pagkaon ug dad-on siya sa gawas alang sa paniudto o panihapon.
Ang Mother's Day usa ka dakong selebrasyon sa Pilipinas tungod sa dakong lugar sa mga inahan sa kulturang Pilipino.
Gitawag kini sila nga "ilaw ng tahanan" tungod sa gugma, kalipay, ug kahayag nga ilang gidala sa pamilya.
Sa laing bahin, si Presidente Marcos niisyu sa Proclamation 878 alang sa maong deklarasyon aron ang mga katawhan makagamit sa ilang katungod sa pagbotar.
Ang maong proklamasyon gipirmahan ni Executive Secretary Lucas Bersamin.
Ang pag-isyu nahitabo taliwala sa mga panawagan sa Commission on Elections nga himuong holiday ang Mayo 12 aron tugotan ang mga rehistradong Filipino nga botante nga makabotar.
Bisan sa gideklarar nga special non-working holidays sa nangagi nga mga piniliay, si Commission on Elections (Comelec) chairman George Erwin Garcia niingon nga magkinahanglan gihapon kini og deklarasyon gikan sa Office of the President.
“Ganun din naman talaga pero again ito ay kakailanganin ng isang deklarasyon, proklamasyon mula sa ating kagalang-galang na Pangulo,” matod ni Garcia.
Niadtong tuig 2022, gideklara ni kanhi presidente Rodrigo Duterte nga special non-working holiday ang presidential election.