File photo
File photo

Editoryal: Luwas nga biyahe

Katapusang adlaw karon sa trabaho ning semanaha, Miyerkules Santo, Marso 27, 2024.

Sugod ugma, Huwebes Santo, Marso 28, holiday na sa Semana Santa.

Ang mga buhatan sa kagamhanan ug ubang pribadong mga kompaniya mag-half day sa trabaho karon. Busa gipaabot nga daghang mamauli sa ilang tagsa-tagsa ka dapit tungod sa long weekend.

Ug sa Dominggo sa Pagkabanhaw, Marso 31, magsugod na usab ang bul-og sa mga pasahero balik sa dakbayan.

Usa kini sa panahon nga magtipun-og ang daghang mga tawo sa mga terminal sa bus, pantalan ug airport.

Alang sa lingaw ug luwas nga pagbiyahe, una sa tanan, kita mismo responsable sa pagpakabana sa kaluwasan.

Sa terminal magmabinantayon sa nagpunsisok nga daghang mga pasahero. Ang dautang elemento, sama sa isnatser ug mangunguot, kanunay mopahimulos sa panahon.

Kon mobiyahe sakay sa pribado o kaugalingong sakyanan, seguraduhon nga na-check-up kini.

Sa kondisyon sa sakyanan, timan-i ang pulong nga BLOWBAG (battery, lights, oil, water, brakes, air ug gas).

Importante usab ang kahimtang sa momaneho sa sakyanan o drayber, sama nga kini nga dunay igong pagpahuway.

Dugang pa, way impluwensya sa gahom sa alak ug gidiling druga. Gani, ang mga drayber sa bus sa Cebu South Bus Terminal (CSBT) gipaubos na sa surprise drug test dili pa lang dugay.

Kabahin kini sa pagpangandam sa tagdumala sa terminal ug Land Transportation Office (LTO) sa kaluwasan sa biyahe.

Labaw sa tanan, hinumdomi kanunay nga kini nga taas nga holiday tungod sa pag-obserbar sa Semana Santa.

Dili sayop ang pagbakasyon ning panahuna apan, dili usab nato kalimtan ang relihiyusong tulumanon. Kon nagpakabana sa atong pisikal nga kaluwasan, unsa na kaha ang espirituhanong bahin?

Seguro nasayod na kita niini. Apan pahinumdom lang kini ug pagpakabana sa Superbalita Cebu.

Balaang mga panghinaot. Luwas nga pagbiyahe.

Related Stories

No stories found.
SunStar Publishing Inc.
www.sunstar.com.ph