Editoryal: Maayo ang tinguha, apan…

Editoryal: Maayo ang tinguha, apan…
SuperBalita Editoryal
Published on

Ang gilaraw nga automation sa Barangay ug Sangguniang Kabataang Election (BSKE) usa ka maayo nga tinguha, apan gikinahanglan nga tun-an pag-ayo ug igong pangandanm

Ang giplano sa Commission on Elections (Comelec) nga i-automate ang BSKE sa Disyembre 2025 gihulagway nga usa ka progresibong lakang, apan dili angayan nga magdalidali sa pagpatuman sa maong desisyon nga way lawom nga pag-analisar sa mga posibleng sangputanan niini.

Dili ikalimod ang mga benepisyo nga natagamtaman gamit ang automated counting machine (ACMs) sa bag-uhay lang natapos nga midterm election niadtong Mayo 12.

Si Comelec Chairman George Garcia nipahibawo nga natagbaw siya sa kahimoan gamit ang ACMs—mas paspas nga guwa sa resulta, likay sa kasamok, ug mas limpyo nga proseso. Ang pilot testing nga gihimo sa pipila ka barangay usa ka positibong timaan nga epektibo ang teknolohiya. Apan ang kalampusan sa pipila ka barangay dili awtomatikong garantiya sa kalampusan sa tibuok nasud, nga adunay lain-laing nga kahimoan alang sa ilang kalambuan, imprastruktura, ug kahimtang sa seguridad.

Ang automation nagkinahanglan ug mas dako nga pondo, ug kini angay nga timbang-timbangon batok sa panginahanglanon sa ubang sektor, sama sa edukasyon, panglawas, ug kalikupan. Importante nga klarohon kung giunsa pag-prayoridad ang automation sa taliwala sa limitadong budget sa kagamhanan.

Samtang ang gitinguha nga pag-undang sa korapsyon ug kagubot sa eleksyon usa ka labing importante nga tumong, ang automation usa ra ka pamaagi, dili solusyon sa tanang problema. Ang kalinaw ug kalimpyo sa eleksyon mas masiguro kon adunay hugot nga implementasyon sa balaod, edukasyon sa botante, ug pagpalig-on sa accountability sa lokal nga Comelec officers.

Busa, samtang suportado ang inisyatibo nga ipaabot ang automation sa BSKE, kini kinahanglan nga mapatuman uban ang klarong blueprint, pundo, ug komprehensibong konsultasyon sa katawhan. Ang kalampusan sa teknolohiya sa eleksyon dili masukod sa paspas nga resulta, apan sa integridad ug kasaligan nga proseso.

Trending

No stories found.

Just in

No stories found.

Branded Content

No stories found.

Videos

No stories found.
SunStar Publishing Inc.
www.sunstar.com.ph