Editoryal: Maayo ba ang pagtangtang sa patik sa polis?

Nipagawas og kamanduan ang Philippine National Police (PNP) nga nagpatangtang sa mga tattoo kun patik sa lawas nga di matabunan sa ilang uniporme. Kadtong matabunan, gimanduan sa pag-execute og affidavit nga di na sila magdugang og patik sa ilang lawas.

Sa kasaysayan, ang patik gilambigit sa pagka manggugubat sa wa pa nangabot ang mga Espanyol dinhi sa Sugbo. Di lang hinuon ang patik makita sa karaan nga mga tawo ug kultura dinhi kay gihimo usab kini sa ubang mga suok sa Pilipinas ug ubang kanasuran.

Apan sa karong kabag-uhan o modernong panahon, kinabag-an sa katilingban lahi og pagtan-aw sa patik. Ang uban naglambigit niini sa mga kriminal. Sa mga babaye nga dunay patik, dunay mga tawo nga lahi og tan-aw kanila.

Ang pagpatik usa ka matang sa pagpadayag kon unsa ug kinsa ka. Dunay uban nga iyang gipadayag ang iyang dako nga gugma ngadto sa usa ka tawo pinaagi sa pagpa tattoo sa ngan sa iyang gimahal. Duna say naggamit og simbolo sa iyang pagpa tattoo.

Apan duna say organisadong mga kriminal nga naggamit sa tattoo isip simbolo sa ilang pagkasakop niini. Daghan sab nga mga piniriso nga nagpa tattoo. Mao nang di malikayan nga dunay mga sektor sa katilingban nga mangyam-id.

Busa, ang PNP nipagawas og memorandum alang sa pagpatangtang sa mga tattoo sa ilang mga ginsakpan nga di matabunan sa uniporme. Apan usa ka magbabalaud nihulagway niini nga unconstitutional ug usa ka pagpinig kun diskriminasyon sa mga tawo nga dunay tattoo.

Ang pagpatik, bisan di dautan, apan sa konteksto sa panahon kini tan-awon. Kon kaniadto usa kini ka paagi sa pagpadayag, pagpakita sa iyang papel sa hut-ong sa usa ka komunidad o katilingban, karon nga panahon gigamit usab kini sa mga kriminal ug komon sa mga nangapriso.

Busa, angay sabton ug dawaton ug gani, suportahan usab ang lakang sa PNP sa pagdili sa makita nga mga tattoo. Tigpatuman sila sa balaod busa, ang polisiya haom sab kanila.