Kumusta ang inyong Kalagkalag? Usa kini sa mga tradisyon sa Simbahang Romano Katoliko. Bisan gisaway sa ubang sekta nga giingong usa sa mga ‘patuotuo’ ug praktis nga wala gibasi sa nahisulat sa bibliya.
Dili kita magdebate bahin sa unsay kamatuoran, apan tataw nga usa kini ka dakong kalihukan nga katilingbanon sukad pa sa karaang panahon hangtod sa kasamtangang henerasyon hinungdan nga giisip nga tradisyon.
Sa pikas bahin, ang Kalagkalag dili lang bahin sa pagtuo apan nahimo nang espisyal nga magkatapok ang pamilya, kabanay ug komunidad nga padayong nagdugtong sa koneksiyon o reunion matag tuig human nagkalagyo tungod sa managlahing pagbugtaw sa panginabuhi.
Sa tradisyon sa simbahan, ang Nobiyembre 1 maoy gitawag nga adlaw sa mga Santo o Todos los santos, gigahin sa mga kalag nga puro o way salang kalibutanon sama sa mga bata.
Sa Nobiyembre 2, ang adlaw sa mga kalag. Limpiyohan ang mga sam-ang ug daghang managkot sa paghandom sa ningtaliwan nga mga mahal sa kanabuhi o kauban kanhi sa pagpakabuhi nga nahimong kabahin sa pag-umol sa imong pagkatawo karon.
Maayong mithi ang paghinumdom ug pagmahal nga way kinutoban bisan mitaliwan na sa laing kalibotan. Dili ba dalaygon nga matang sa pagmahal?
Karong adlawa ug ugma, gideklarar nga piyesta opisyal. Walay trabaho ug klase tungod sa pag-ila sa gobiyerno sa tradisyon sa mayoriya sa iyang populasyon.
Busa, bisan dili mga magtutuo sa Kalagkalag, makapahimulos sa higayon alang sa paglaag ning long weekend o kaha sa pagtutok sa ubang buluhaton sa panimalay.
Sa mga deboto sa Simbahang Romano, ang Kalagkalag gawas sa pag-ampo, alegre kini human daghang magluto ug pagsaw-an sa kabanay ug mga bisita.
Sa atong pagpauli sa tagsatagsa ka mga dapit, magmatngon kanunay sa pagbiyahi. Kabanay mokonsiderar sa kausaban sa panahon ug kaluwasan sa sakyanan alang sa mabulukon ug mabungahon nga kasaulogan.