Sa nagpadayon nga imbestigasyon sa Ubos Balay Balauranan, si kanhi mayor Tomas Osmeña usa sa mga resource person. Siya subli nga namasangil nga ang kanhi hepe sa Cebu City Police Office (CCPO) tigdawatan og payola gikan sa ilegal nga sugal dihang siya na ang nangulo kaniadto sa Criminal Investigation and Detection Group (CIDG).
Ang alegasyon di na bag-o kay mao kini ang pasangil ni Osmeña batok kang Garma niadtong 2019. Gani, nihulga si Garma kang Osmeña nga iyang pasakaan og libel tungod sa mao nga pasangil.
Daghan ang nakaingon nga nakabawos si Osmeña human sa iyang paglingkod atubangan sa mga magbabalaud nga nag-imbestigar sa extra-judicial killings ug Philippine Offshore Gaming Operator (Pogo). Ingon sa kalbaryo sa kanhi chief executive si Garma dihang gidestino kini sa Dakbayan sa Sugbo bisan di uyon ang kanhi mayor sa assignment atol sa iyang administrasyon.
Gawas sa pagsaksi ni Osmeña, nakaangkon siya og laing kadaugan human gibasura sa Ombusdman ang mga kaso nga gipasaka ni Garma batok kaniya base sa pagbuhi sa kapulisan sa tulo ka mga suspek sa ilegal nga pagpamaligya og butane canisters.
Sa nagpadayon nga House hearings sa quadcom, duna pa ba kahay dugang ibutyag ang kanhi mayor sa umaabot nga mga semana kalabot sa iyang nasagap nga mga impormasyon atol sa iyang pangatungdanan?
Duna ba kahay mga tawo nga mohatag og dugang mga impormasyon sa kanhi mayor aron iyagyag ang mga kasayuran ngadto sa publiko pinaagi sa live nga mga sibya sa mga telebisyon.
O duna pa ba kahay laing mga tinubdan sa impormasyon gikan dinhi sa Sugbo nga ipatawag ang Lower House nunot ning nagdagan nga imbestigasyon sa EJK ug Pogo?
Ang live broadcasts sa committee hearing nasusama na gud og teleserye, diin nakita si Garma nga nihilak human siya gi-contempt sa mga magbabalaud kay kuno wa nikooperar sa imbestigasyon. Matod ni Osmeña nga di angay tuohan ang paghilak ni Garma kay sama og drama kay nailhan ang kanhi police official nga isog ug maldita.
Ning dagan karon sa mga hitabo, ingon sa nakalingkawas ug nakabawos si Osmeña sa nahitabo kaniya panahon sa administrasyon ni kanhi Presidente Rodrigo Duterte. Kay bisan giunsa pa niya og pangugat, wa siya panumbalinga sa kanhi presidente.
Gani, atol sa duha ka local nga mga eleksyon, ang kanhi administrasyon didto nisuporta sa iyang mga kontra. Apan karon ingon sa mibaliktad ang hangin. Mabuhi ba kaha og balik ang political career ni Osmeña?