Ang bag-ong sakit karon nga mananakod kaayo nga giatubang sa health authorities mao ang pertussis. Ang simtomas niini mao ang grabe’ng hutoy sa ubo nga masusama na og hubak, ordinaryo nga hilanat ug ping-ot nga ilong o subaw sa sip-on.
Duna nay nangamatay nga mga bata ning mao nga sakit nga dala sa usa ka matang sa bacteria. Kuyaw kini sa mga bata, labina sa mga masuso. Busa ang Dept. of Health (DOH) nag-awhag sa mga ginikanan nga pabakunahan ang ilang mga anak batok sa pertussis.
Karon kay Semana Santa man, angay nga magmatngon ang mga ginikanan sa pagsulod sa mga tapok, labina sa mga simbahan ug uban pang mga dapit nga tapukanan sa mga tawo. Di angay nga dad-on ang mga bata ug masakiton nga mas kuyaw kon maoy matakdan ning sakita.
Gihulagway sa DOH nga mananakod kaayo ang mao nga sakit, nga makuha gikan sa tawo nga natakdan ug surfaces nga napiskan, sama sa mga lingkuranan, bungbong ug uban pa. Busa, kon ikaw dunay anak nga gamay pa, huna-hunaa una og maayo kon angay bang dad-on ang imong anak nga wa pa mabakunahi. Mas maayo nga pabakunahan una ang bata aron duna kini resistensya batok sa kagaw sa mao nga sakit.
Kon way ikabilin sa balay sa gagmay pang mga anak, mas maayo nga magpuyo lang una kay sa dad-on ang bata nga di pa bakunado ngadto sa simbahan.
Ning nakalabay nga mga semana, duna nay outbreak ning mao nga sakit sa Quezon City, Pasig ug Iloilo. Dinhi sa Sugbo, pipila lang ka mga kaso ang kompirmado, apan bisan pa niini, di kini angay nga kompyansahan.
Busa, mas maayo nga panalipdan daan ang mga masuso ug mga bata kay sila ang dali nga masakit ug mas kuyaw alang kanila kini nga matang sa balatian kay duna nay nangamatay.
Di angay mahadlok kay mas kuyaw ang Covid-19 kay bag-o pa kadto nga sakit. Kining pertussis karon duna na may klaro nga bakuna. Mag-amping lang og maayo aron malikay sa sakit, labina gyud kon duna pay gagmay nga mga bata o masuso sa balay.
Magsaulog sa Semana Santa apan mag-amping.