Sa pag-asumer ni Acting Mayor Raymond Alvin Garcia, nitumaw ang daghan kaayo nga mga butang nga napasagdan sa Siyudad nga mahinungdanon unta kaayo alang sa pagserbisyo sa katawhan. Usa niini ang super health center sa Brgy. Apas nga ang problema ra diay mao ang mga dokumento nga gikinahanglan gikan sa Siyudad. Nabuksan na kini sa miaging adlaw nga siya mismo nitambong.
Mao sab ni ang problema sa laing proyekto nga gigastuhan sa Dept. of Health (DOH 7) sa tambalanan sa Brgy. Guba. Wa matrabaho kay dunay mga kakuwangan sa mga dokumento gikan gihapon sa Siyudad. Karon nisaad na ang kontraktor nga iyang humanon ang proyekto sulod sa unom ka bulan.
Kini nga mga imprastraktura mahinungdanon unta kaayo alang sa pagserbisyo sa panglawas sa mga Sugboanon. Apan nahikawan tungod sa kalangay sa ilang pagbukas.
Sama sa paghuman sa Cebu City Medical Center (CCMC) nga gisaad sukad pa niadtong 2020, apan hapit na lang ang eleksyon sa 2025, wa pay ando kanus-a mahuman.
Sa matag adlaw nga kalangay, paghikaw kini sa serbisyo nga angay ug gipangita kaayo sa mga kabos sa katilingban.
Ang CCMC gilauman nga makahatag og mas lapad ug maanindot nga serbisyo sa mga taga Dakbayan sa Sugbo kon mahuman na kini. Makaserbisyo kini og gatusan ka mga pasyente tungod sa kataas sa kapasidad. Apan magnapulo na lang ka tuig kini sukad gisugdan, ang katukoran ingon sa way kahumanan.
Makauulaw baya kaayo ni kay pwerte natong panghambog sa siyudad nga queen city of the south apan kon tan-awon og maayo, sa natad sa serbisyo sa panglawas, layo ra kaayo sa ubang mga local government unit (LGU).
Hinaot pa ning pag-asumer ni Garcia nga mubo ra kaayo kay unom ka bulan, ang tanang mga proyekto sa Siyudad alang sa katawhan iyang mapairog alang sa paghuman niini.
Sama sa iyang gibuhat sa Cebu City Sports Center (CCSC), kansang oval track wa diay masugdi og trabaho usa ka tuig human kini gisirhan ug gitago gikan sa publiko.